Аьмну Аьрасатнавунияр Дагъусттаннай 3-лийну чансса дур преступленияртту

Дагъусттаннал виваллил иширттал министр Аьбдурашид МахIаммадов январьданул 23-нний хьунаавкьунни республикалул СМИ-лул каялувчитуращал ва блогертуращал.

Хьунабакьаврий гьуртту хьунни ДР-лул минкомсвязьрал министр Сергей Снегиревгу.
Дурсса давурттая ихтилат бувну мукьах, министрнал жавабру дуллунни журналистътурал суаллахьхьунгу.

Цала хьхьичIмукъуву, аьщу-ххуттай авцIуну, министрнал бувсунни дукIусса шинал лахъишиврий цукунсса ккаккияртту ва хIасиллу хьуссарив цала ведомствалий. Бувсунни цуку-цукунсса захIматшивурттащал хьунаба­кь­лай буссарив ва ми бартдигьаврил ххуллий органнал зузалтгу, печатьрал зузалтгу цачIуну, ца мурадирай зун аьркиншиву ва зийгу бушиву.

[dropcap]Б[/dropcap]униялагу, Дагъусттаннал Виваллил иширттал министерствалул махъсса чIумуву хьун дурсса хьхьичIуннайшивуртту дур ччимур региондалул дахIалай учин­сса. Цамур къахIисавну, Аьрасатнал лагрулийсса аьмсса преступленияртту Дагъусттаннай дур шамлийну чансса, Ухссавнил республикарттал дянив – ца ва дачIиннул чансса. Яла цукунсса дикIайссар ккалли дансса кка­ккияртту!