Дагъусттаннал яттил дикI Ираннайн тIайла дуклай буссар махъзуманив. Гьашину 640 тонна дикIул тихун тIайла дуркшиврий ва тайнначIа жулла дикI кьиматрай душиврий чIурчIав дунни цимилагу ва давриха зузиминнал.
П. Рамазанова
Утти Аьрабусттаннайнгу тIайла дуклантIий бусса бур, микIлачIун дурну, самолетирттай. МахIачкъалаллал АхIмад-Хан Султаннул цIанийсса аэропортрал гендиректор Арсен ПирмахIаммадовлул тIийкун, ларгсса нюжмардий ххал бивгьуну бур тайннал делегациялущал дикIул бизнесрал масъалартту.

Ванал бувсунни дикI ххилаххаврил масъалагу Аьрабусттаннал авиакомпаниялул цала бакIрайн лавсшиву. Мяйжанссар, ва иширая рязий бакъассагу чIявусса бур. «Базаллуву яттил дикIул багьа гьаз хьунтIиссар. Ятту ябувултран къулайсса, Дагъусттаннал агьалинал жипаннив къиялунсса давур», — тIий ур агропромышленностьрал идаралий зузисса ХIамзат ХIусайнов.