Дагъусттаннал БакIчи Владимир Васильевлул «Мюхчансса Дагъусттан» тIисса цIанилусса проектрал лагрулийсса концессион кьутIи иширайну щаллу даврийн дагьайсса батIаву дунни.
Концессион кьутIи – му хъанахъиссар паччахIлугърал ва таксса залуннал дянивсса уртакьшиврийсса зузаврил жура.
Ва масъалалул агьамшивугу кIицI ларгун, Владимир Васильевлул дакIнийн бувтуна ваниннингу вара сияхIрай ххал дигьлай бивкIшиву Дагъусттаннал ххуллурдайсса мюхчаншиву дуруччаврил тема, лявкъушиву му масъала щаллу бувансса ххуллурду, амма хIакьину ххуллурдайсса тагьар паракьатну щябивкIун бикIан бюхъайсса дакъашиву, му даххана дувансса цIу-цIусса чаранну ттигу ляхълан аьркиншиву. КIицI лавгуна ва масъала щаллу баврицIун Федерал центрданулгу кабакьу буллай бушиву.
Дагъусттаннал премьер-министр Артем Здуновлул увкуна:
— 2017 шинал апрельданий Дагъусттаннал МЧС-рал концессион кьутIи чирчуссар «Социал системартту» тIисса ООО-лущал ва «Азимут» АО-лущал цачIуну. Му кьутIилул хIасилну хьуссар ххуллурдай дурсса административ низам лиян дурсса иширттал фотофиксация дувансса комплексру бишаву. Му бакъассагу, хIисаврайн лавсун буссия ми низам лиян давуртталсса буллансса кIанттугу щаллу баву. Жулва хьхьичI бивхьусса масъалану хъанахъиссар таблолий жунна чIалачIаву бюджетравун циксса арцул сурсатру наниссарив, ми арцугу наниссар ххуллул фондравун, цIусса ххуллурду булланшиврул ва бувми ххуллурду бакьин булланшиврул.
Цалла дуллалимур даврия ва хьунадакьлакьисса захIматшивурттая бувсуна «Служба – 112 РД» ГКУ-лул каялувчи Жамалуттин Баговлул. Мунал бувсмунийн бувну, концессиялул лагрулий бувну бур 137 миллион къурушрансса 183 азарва хIукму, так ГИБДД-лул линиялийн бувну бюджетраву ххи хьуну дур 38 миллион къурушрал. Му бакъассагу, кьамул бувну бур му кьутIи хьхьичIунну щаллу даву мурадрайсса цаппарасса хIукмурдугу.
Гьарца ихтилатчинахгу вичIи дирхьуну, Владимир Васильевлул увкунни:
— Шинал ахир цукунсса хьунтIиссарив къакIулну ливчIсса тагьардануву личIлан къааьркинссару жува. Цалчин, арцул сурсатру дагьайнийн харж дуллан аьркинссару, кIилчин, мюхчаншиву щаллу дуллан аьркинссару. Щалва иш – тагьарданухсса бургавривур: захIматшивуртту дур тIий, гъалгъарду къабуллай, масъалартту щаллу буллан аьркинссар.
ХIадур бувссар
Бадрижамал Аьлиева
