Жу хьхьичIмур номерданий бувсъссия Новороссийск шагьрулул райондалул судрал, машгьурсса аьлимчунал, философиялул элмурдал доктор Эльмир Кулиевлул (му къажарнал миллатрая ур) дурсса Кьуран луттирал оьрус мазрайнсса таржума экстремистссаннун ккалли дуршиву ва му лу экстремист литературалул федерал сияхIравун бувтшиву. «Россия для всех» тIисса интернет-порталданул му иширал хIакъираву Эльмир Кулиевлухь цIувххуну бур:

— Судрал вила луттирайн къадагъа дурсса хIукмулийн ци учара ина?
— ТIайламур бусан, ттун хар-хавар бакъасса иш хьунни му. Экстремизмращал талатиссару тIисса, чIиви-хъунсса къуллугърайсса чиновникнахьхьун Аьрасатнал законодательствалул дуллуну дур ихтияр, миннал тIийкунсса динийсса экспертиза дуллан, луттирал авторнан, издательнан, му предмет куртIну кIулсса аьлимтуран хавар къабувну, ччимур динийсса луттиран, философиялул захIматран къадагъа дуван.
Экстремист материаллал сияхIравун багьлагьисса ца­ппара луттирду щаллагу дунияллул ирс-ххазиналул бутIар. Мунияту, щаллагу дунияллий кьиматрайсса луттирдан къадагъа дуллалаврийну аьрасатнал экспертътурал къадуххинтIиссар. Зул билаятрай МухIаммад Идавсил (с.аь.с.) оьрмулиясса хаварду ккалангу, имамтурал аль-Гъазалил ва ан-Нававил захIматру ккалангу къадагъа дур. Вана утти транспортрал прокурорнан дакIнийн багьну бур Кьурандалул таржума ккалан къадагъа дуван!
— ХьхьичIрагу Омск шагьрулул райондалул судрал вил луттиран къадагъа дурну дур. Ина ккалан къадагъа дусса чичу, публицист хьуну ура!
— Экстремист журалул оьвчавуртту дуну тIий дакъар къадагъа дуллалисса. Инсантал на чивчусса, таржума бувсса лу­ттирду ккалай бур, ми луттирду ккалаккими кувний сситтуйсса следовательтурайн бакIрайн багьлай бур. На чивчумур ккалаккаву хас къабизлай бур. На зувинниха ливчусса луттирду итабакьав, автор хIисаврайгу, таржумачи хIисаврайгу. Ми луттирдал тиражгу хъинну хъуннасса дур.
— РАИС-рал (Российская ассоциация исламского согласия) хъунама Фарид Салман ур вилмур таржума салафист школар, традиционный исламрая архссар тIий.
— Фарид Салманнул мукун тIунсса хIуччалул гьануну лавс­­хьунссар цайминная бавмур. Жул таржума – арулла шинал лажиндарайсса, хъинну хъирив лавну дурсса давур. Аьрасатнал аьлимтуращал уртакьну жу хIадур бувссия Аьрасатнал вузирдансса корановедениялул цалчинсса багьайкунсса учебник. Циняв коллегахъан тIааьн дизлай дакъахьунссар жул даврил хьхьичIуншиву.
— Ина Азирбижаннал гражданин ушавривувагу бакъарвав иш? Машгьурсса таржумачи, публицист цаламанан ккалли аннияр чилманан ккалли уван бигьархха. Оьрус маз, винма кIулссакун, чIявусса миллатирттал маз хъанай бухьурчагу.
— Му кIану хIисавравун ласласиссагу бур. Ттухь тIайланма, лажин-лажиндарайн, оьрус мазрайн Кьуръан оьрусналли таржума буван аьркинсса тIиссагу хьунни. Аьрасатнал аьлимтуращал чIярусса шиннардий уртакьну зий ивкIсса ттун кIулли мукун учайми нажагь бушиву. Татарсттаннайгу на чил инсанну акъара. Нагу, ттул творчествагу кIулминнан кIулссар на исламрал кьимат­райсса ххазинарду ппивгу, машгьургу бувавриха зузисса инсан ушиву, экстремист пик­рирдаягу лап архсса ушиву. Ттул мурадвагу личIи-личIисса миллатирттал, диннал агьали, ми ххачпарас бикIу, бусурман бикIу, куннан кув бувчIлачIавур.
ХIадур бувссар П. Рамазановал