Ссайну дакIний лирчIри вин ларгсса нюжмар? Укунсса суал булару жу сайки гьарцагу номерданий.
Мурад Жалалов, экономист:
— Ларгсса нюжмардий Британиянал парламент махъаллил хьунни Сириянаву дяъви байбишин. Дунияллул аьрш-куршлил заллухъру хьун ччисса Америка бур Ливиянаву, Иракьнаву куннасса гъургъаза Сириянаву дуван кьаст лархIуну. Дяъвирдая ихтилат нанини миннацIун бакьайсса британиянал ва ххуллух аькьлулийсса даву дунни, миннал премьер-министргума ласу-ка бувхIусса куна ливчIун ия, дяъвилувух хIала буххан аьркиншиврий парламент мукIру бан къашайхту. Американалма президентнал баян бунни «талатаврил майданнив ца аьскаргу аьскар ушиву», яъни цувалу талангу хIадурну ушиву Сириянащал. На хъинну ххари увунна Барак Обамал бакIрайн кьутI учинссагу буккаврий. Жунма кIулли Американал бусурман билаятру кIунттихьхьун ласун ччисса политика душиву, му ххуллий миннал аьмаллал дазу дакъар, вай Дагъусттаннай хъанахъисса къаххуйсса иширттал дайдихьугу Американаватур нанисса. Миннан ччай бур бусурман куннащал ку ччалаччи буван, куннайн ку бичин, жулва навтлил, газрал лагма бувккун авадан хьун.
Ларгсса нюжмардий Приморский крайрай шагьрурду щинахьхьун лаглагисса тагьаргу дакIру шиши дагьан дуллалисса дур. Сайки 8 метIралул лахъ хьусса Урал неххал чIявусса агьали къатта-къушлицIа, думуницIа бунни. Жунма цал ттигу исват хьунни инсан тIабиаьтращал къалаяйшиву, жуварив тIабиаьтрал гужрая хавар бакъасса кунма къуццу тIун бикIару. Тай кьини дурксса инсантал Дагъусттанная архну бунугу, жунма тай хъамабитлай бакъар. Ссут гъан хъанай дур, Хабаровск, Владивосток бявкъусса кIантту бур. Тукунсса балардаща буруччиннав агьали. ХIазран къаучайхьунссар «кIул бакъа бала ялун къабияннав» куну.
Жарият Кьурбанисмяилова, цIигьур-кондитер:
— Ларгсса нюжмар кьини лавгссияв нагу Эмиратирттая ларсун бувкIсса МухIаммад Идавсил (с.аь.с.) ва Мунал наслулул затру ккаккан. Нюжмар кьини хъаннил кьинир тIий бия, дяхьхьуниву лавгссияв Аьли Аьлиевлул спорткомплексравунсса учирданий бацIан. Ипподромрая миккун бияннинсса трассалий хъаннил чIявушиврул хIайран хьуну бивкIра. Гайкссава хъами давурттай ягу шаппа-шаппа бивкIхьурчагу га кьини, машааллагь, биялсса хъами бур тIий бивкIра. Спорткомплексравун жу бувхру ссят ацIния кIинний ахттайнмай, 11 ссят хьуна жул яржа бияннин ялугьлай. Трассалий щачу-кьючу дия, аьлагъужа бия, спорткомлексраву — гьарташиву, рахIатшиву. Ххишала бакъа ссавур дусса инсантал бия низамралсса буллалими: «Укун мубараксса кIанттай ссавур дуну бикIияра, бигьанма зат щаллу къашайссар», — тIий бия. Ккучунналуву яхI бан къавхьуну лавгссагу хьунни, на навагу, тIайлассар, ца ппурттуву лажиннича на итабакьияра шаппай тIисса даражалийн багьунав нигьабусаврил. Ялагу кьянкьа дурссия. Мюрщи оьрчIругу чIявуя, миннайх кефир, щин, нацIу-кьацIу дачIлай бия. СпорткомплексрачIан бияннин агьалинал мюхчаншиву дусса пропускной пунктру бия «Анжи-АреналучIату» байбивхьуну, миннул агьали аглан буллай бия. «Анаварсса кумаграл» машинардугу бия, га кьини кIира щарсса диркIусса хавар бия ккуччу хьуну, ца дугьарасса, ца жагьилсса дия тIий бия. Ци щачу-кьючу духьурчагу, ци кIиришиву духьурчагу мухлукьат най бия МухIаммад Идавсил (с.аь.с.) затирттай тамаша бан. Мунал чIарардайн, хялатрайн ябияйхту макь дацIан дуван къахъанай аьтIиссагу бия. 26 экспонат дия Эмиратирттая, ларгсса шинал Грознайлив хьусса выставкалий 16 экспонат дия тIий бия. МухIаммад Идавсил (с.аь.с.) затру Дагъусттаннал аьрщарайн дияврия ххарину дуаьрду дуллай бия дагъусттаннал агьали. Я раппий, я Аллагь, барачат бишиннав Дагъусттаннал аьрщарай, питнарду, къалмакъаллу духлаганнав, аькьлу ххув хьуннав.
