Ссайну дакIний лирчIри вин ларгсса нюжмар? Укунсса суал
ва мунинсса жавабру дулару жу лях-карах жула кказитрай.

МахIаммадхIажи Маккуев, АьФ-лул КIулшивуртту дулаврил министерствалул отличник, Дагъусттаннал лайкь хьу­сса учитель:
Ларгсса нюжмардий ва мунияр хьхьичIсса гьантрай кулпатращал лавгссив ттула аьр­ххилий Москавлив. Аьрххилул мурадгу бартбивгьуну, жун пик­ри хьуна Италиянавун бигьа лаглан гьансса. Тай бия ЦIусса шинал байран хьунадакьлакьи­сса гьантри. Бивру жу Ватикан, Капитолия, Колизей, Венеция, Рим шагьрурдайн. Тай шагьрурдай хIакьинусса кьининин яхьуну дур хьхьичIарасса караматсса скульптурарду дусса, авурсса къатри. Цинярдагу къат­ри цанниха ца лархьхьусса архитектура дусса дия. Ряхра зивулияр ларайсса къатри дакъая ти­кку. Бакъая тайнначIа жучIава кунмасса «ланкрузерду», «лексусру», хъуни машинартту. ЛяличIину ххуй бивзунни щинай бувсса Венеция шагьру.

Анавар кумаграл машинарттува бия катердай къашайшалтрачIан занай. Ва шагьру хIасул шаврил тарихва бия бусалдаравун багьсса. Хъинну ххирасса бия ти­ккусса оьрмугу. Шагьрулувух­сса автобусрал билетрал багьа бацIлай бия сайки кIива евролун (50 – 60 къ. жулла арцуйну), шамлий ххирану бия бензин. Амма тайнначIасса яла чIивимур харжгу бия 1200 евро (сайки 90 азарда къуруш). ХIасил, хъинну дакIний личIансса ва асар хьунсса хьунни жул чил билаят­райнсса аьрххи. Мива гьантрай бувкIру махъунмай Москавлив. ЦачIу дихьлан бивкIукун Москавливсса ва Италиянавусса ЦIусса шинал байран хьунадакьаврийнсса хIадуршиннарду, хъуннасса тапаватшиву дия. Москав шагьру ляличIину усттарну чIюлу бувну, хьхьувайгума, дях­тта кунма, чанна лавхъун бия. Укунсса ххарисса асардащалгу зана хьуну, ичIура кулпатращал хьунадакьарду ЦIусса шин.

ХIадур бувссар
Имара Саидовал