Ссайну дакIний лирчIри вин ларгсса нюжмар? Укунсса суал ва мунинсса жаваб дуккайссар зу чIун-чIумуй жулва кказитрай.

Маржанат Аьбдулсаидова, фармацевт, аптекалул хъунмур:
Ларгсса нюжмарданий баян бунни Аьрасатнал президент Владимир Путиннул ва Людмила Путинал цивппа личIи хъанахъишиву. Гьай-гьай, ми бия кIиягу хушрай личIи хъанахъиссару, кIинналагу хIукмур тIий. Амма Людмила Путина мукун къювулий гъалгъатIий бияхха, чIалай бия мунин личIи хьун хъинну захIматну бушиву, ца ппурттуву иттав макь гьурххи хьуну ссихI дуккангума къабюхълай бавцIуна. Президентнаяния чунни, щилчIав личIи шавриявагу гъалгъа тIун ттул къуллугъ бакъассар, гьарманал цалва ишри личIи хьунгу, цачIун хьунгу. Гьарманахь духьунссар ихтияр ца кьариртун, цамур щарсса дуцингу ягу дурагу къадуцингу. Так ттунма хъинну кьурчIи бивзунни Людмила Путина къащилий гъалгъа тIутIисса куц. Му бия Владимир Владимировичлуйн барчаллагьрай бура, оьрчIаха аякьа дусса ппу уну тIий тIий. Президентнал дакъасса каши оьрчIаха аякьа дуллан яла щилли дикIан? Ва ялагу.

Централ телевидениялул журналист Максим Киселевгу ия, лахъунтту къабуллай, къалмакъал къадурну, нахIуну, паракьатну личIи хьунни президент ва мунал щарсса тIий. Цумур билаятрал президентнал данссар къалмакъал щарссания личIи хъанахъийни? Къалма­къал дан ччарчагума, щарссанищагу къахьунтIиссар. Кув бур, ссал балаллий бура, Людмила Путина личIи хьурчагу цичIав чанну къабитантIиссар, гьарзат аьркинмунил лащу-щаллу буллай бухьурча, яла хъамитайпалун цир аьркинсса тIий. Людмила Путинагу жува кунмасса хъамитайпар. Мунингур ччисса ласкъатлул талихI. Гьарца хъамитайпалун ччисса кунмасса.
Ххаримуниягу бусан, уссил душ щар буларду. Миннал ташугу хIазсса хьунни. Уссил кулпат хаварбакъулий базаллуву хьунабавкьуну бия кьура шинал хьхьичI цищала университетраву дуклай бивкIсса хъамитайпалущал. Танил щар дуцай оьрмулувусса арс ур увкуну, уссищарнилгу ттулгу щар булай чIумувун бивсса душ бур увкуну, бачу жулва оьрчIру кIул буваннуча куну, кIул бувну, жагьилминнан дакI даркьуну, буварду ца ххуйсса хъатIи.

Исмяил Кьурбанов, инженер-машиностроитель:
— На ххари хьура Дагъус­ттаннал президентнал къуллугъ чIумуйну бартбигьлагьисса Рамазан АьбдуллатIиповлул Аьра­сатнал обороналул министр Сергей Шойгущал Каспийскаллал цIаларгсса «Дагдизель» завод зузи бансса кьутIи чичаврия. Му хъуннасса ххаришивур Каспийскаллал агьалинан. «Дагдизель» Каспийскаллал агьулданун ччатI буллусса завод­ри, угьарасса инсаннахь щихь цIуххирчагу, му заводрай зий уссияв учинтIиссар. ЧIявусса зузи кIантту хьунтIиссар.
Ттигъанну Алтайрая увкIра, душнин арс увну, та хъуна уван лавгссияв. АцIра шинни душ ласнащал тийх мина дирхьуну. Неъматсса кIану бия, низам дия. Шамилчинсса оьрчIри ттул душнил, тамаша бивзунни, Алтайский крайрал губернаторнал 50 азарда къурушгу дуллунни душнин, къатри дансса участокгу. Укунсса аякьа дия чIявусса оьрчIру буллалисса кулпатирттаха.

ЦIуххаву дурссар
ПатIимат Рамазановал