Гьар шинах кунма, МахIачкъалалив, Совет Союзрал кIийла Виричу АхIмад-Хан Султаннул гьайкалданучIагу хьунни Бюхттулсса Ххувшаву ларсун 81 шин шаврин хасъсса мероприятие. Ванил сиптачитал ва сакиншинначитал бия 1-мур ЦIувкIуллал Жяматийсса совет.
Муданма кунма, лакрал чIявусса агьали бавтIун бия гьайкалданучIан кIюрххила Буттал кIанттул цIанийсса Хъун дяъвилий гьуртту хьуминнал суратругу дургьуну, тIутIал кацIругу лавсун.
Жяматийсса советрал хъунама, профессор МахIаммадбаг ХIусайхановлул кIицI лавгуна, АхIмад-Хан Султаннул щала оьрму Ватандалуха дакI тIайлану къуллугъ баврил ва чувшиврул эбратну хъанахъишиву, ЦIувкIравгу, ЦIуссалаккуйгу Виричу хъуннасса шадлугърал тагьарданий хьунагу авкьуну, лахъа-хъунгу увшиву цила чIумал.
Дагъусттаннал Чичултрал союзрал хъунаманал хъиривчу Супиян Оьмаровлул кIицI лавгуна АхIмад-Ханнул оьрмулул ххуллу гьунарданул ва чувшиврул бусалану хъанахъишиву.
«АхIмад-Хан Султаннул хасиятирттал ххуйшиврул дунияллийцири агьали хIайран бувссар. Чувшиву ххисса ушивруцIун, му инсаншиву дусса, пахру-ххара бакъасса, цала машгьуршиврия ламусравун агьлагьисса инсан ивкIссар. Ххувшаврил кьинигу, Виричу увсса ва дунияллия лавгсса кьинирдайгу гьайкалданучIан батIайссар лакрал жямат. ЦIакь хьусса аьдатри», – увкуна Супиян Оьмаровлул.
Бусравсса аксакалтурал МахIаммад Айдаевлул ва Аьбдуссалам Магьдиевлул ихтилатирттаву кIицI лавгуна АхIмад-Хан Султан кунмасса Вирттаврал хIурмат бюхттулну бикIан аьркиншиву, хIакьинусса кьинигу СВО-лий чIявусса Дагъусттаннал жагьилтал, вайннавух лакгу бушиву билаятрал мурадру буруччаврил цIаний ярагъ кIунттил бувгьуну талай, тайгу Ххувшаврищал цIуллуну-сагъну шаппа-шаппай зана хьуннин ялугьлай бушиву.
Виричунал мачча-гъаннал цIанияту бавтIцириннахь барчаллагь куна АхIмад-Хан Султаннул ссурахъийл арс Сайдун ХIажикьурбановлул.
МахIачкъалаллал ва Каспийскалаллал школардай дуклакисса оьрчIал бувккуна Ххувшаврил темалун ва Виричунан хас бувсса шеърирду.
Гьашинумур байрандалул культуралул программа кутIасса дия, Жяматийсса советрал хIукму бувна, махъ зуманив агьалинан хъунисса зараллу хьуну бухьувкун, концертралмур бутIа программалувун къабутан.
Шиккува кIицI лаганна, вайва гьантрай АхIмад-Хан Султаннул гьайкалдануцI тIутIив дихьлахьисса митингру хьушиву Цалчинмур ЦIувкIрав, Каспийскалив ва Москавлив. Муданма кунма вай мероприятиярттайгу чялишну гьуртту хьушиву ЦIувкIуллал жяматрал вакилтал.
ПатIимат Рамазанова
