Буттал кIанттул цIанийсса Хъунма­сса дяъвилий Ххувшаву ларсун 81 шин шаврин хасну 9-мур майрал кьини республикалул циняв шагьрурдай ва районнай хьунни «БивкIу бакъасса полк» акция.

Ва сакин дурну дия Дагъусттаннал Жагьилтурал иширттал министерствалул муниципалитетирттащал цачIу.
МахIачкъалалив «БивкIу бакъасса полкраву» гьуртту хьунни 30 азарунния ливчусса инсантал. Шагьрулул агьалинащал ва хъамаллуращал кьюкьлуву най бия Дагъусттаннал бакIчинан кIанайсса Федор Щукин, Дагъусттаннал ХIукуматрал председательнан кIанайсса МахIаммад Рамазанов, Дагъусттаннал жагьилтурал иширттал ­министрнан кIанайсса Камил Саэдов, жяматийсса организациярттал каялувчитал, хасъсса аьралий операциялул гьурттучитал ва миннал кулпатру, студентътал.
– Дагъусттаннай 140 азарунния ливчусса инсантал гьуртту хьунни аьдатравун дагьсса «БивкIу бакъасса полк» акциялуву. Азарахъул дагъусттанлувтал цала буттахъал, буттал буттахъал ­суратругу дургьуну лавгунни кьюкьлуву дяъвилий жанну дуллусса вирттаврал аьпалун. «БивкIу бакъасса полкрал» цачIун бунни щаллу­сса кулпатру, личIи-личIисса никирттал инсантал, личIи-личIисса халкьру. Ва жула аьмсса тарихри, аьмсса къювугу, аьмсса Ххувшавугур, – увкунни Камил Саэдовлул.

Андриана Аьбдуллаева