Апрельданул 30-нний МахIачкъалалив, Поэззиялул театрдануву, хьунни ­оьрус мазрай назмурду чичайсса ­Аьйшат Расуловал шеърирдал вечер «Нину – цалчинсса махъри» тIисса цIанилу.

Аьйшат кулпатрал психологри, ванил чичай назмурдугу. Цила тIийкун, стихотерапия хIисаврайсса. Ва ххуллухьмур вечер хас дурну дия ниттихъан. Аьйшатлул бувккунни ниттихъал ва оьрчIал арардаясса, нинушиврул ттюнгъасса асардаясса шеърирду. Ванил творчество, ниттихъал тема гьануну ларсун, кIива бутIуйх дачIинсса дур: ниттихъан хасъсса ва цуппагу мукьва оьрчIал нину бухьувкун, нинушиврул асарду аьч буллалисса.
Ниттихъан хас бувсса шеъри бувккунни Аьйшатлул буттарссил Ирина Буттаевалгу. Вагу математикалул учительница бухьурчангу, назмурду чичаврил гьунар бусса бур. Ихтилат бунни лакрал бусравсса чичу, шаэр Бадави Рамазановлул душнил ­Изабелла ­Ибрагьимовалгу. Аьйшатлул «Мама, люби безусловно» тIисса шеъри бувккунни «Контраст» тIисса кино-модельная студиялул ученица, назмурду дуккаврил конкурсирттай ххув хьусса Забазнова Анастасиялгу.
Бусанна Аьйшат «Аьрасатнал ниттихъул» дастталугърал Дагъусттаннаймур суккушиннарал каялувчинал хъиривмур бушивугу, ванил вечерданий СВО-лий чувшиврий арсру ливтIусса ниттихъулгу гьуртту хьушиву.
Вечер дурссар «Аьрасатнал ниттихъул», «Сила Матерей» ккураннал ва республикалул Культуралул министерствалул кабакьаврийну.
«Аьйшат Расуловал шеърирду ккалаккисса чIумал, мунил асардал ттюнгъашиврул, ккалаккисса тIааьнсса такьвалул ттуламур нину хьхьичI дацIан дувай. Цумур назму ласурчангу, чIарав дусса ягу дакъасса ниттиха­сса хьуннав, оьрчIал тарбиялуцIун бавхIусса хьуннав, ­гужсса асарду биян бувай. Яла-яларив, Аьйшат оьвтIий бур оьрчIах ччаву дуну, аякьа дуну тарбия буллан, миннан дакIнин щунмур къабувну. Ва цIанасса аьратталсса, хъювсулсса заманнай жунма оьрчIру аякьалий ябан багьлай бур, тIайламур ххуллия хIура хьун къабитан, оькки ххуй къабизан. Ва иширавугу Аьйшатлул назмурдал бияла – дирхьусса дарсирал ххуллийсса бур», – тIий бур Жамилат Ибрагьимова.