«Агана зухьва Аьрасатная ца мукъуйну ци учивияв куну цIуххирча, ци учинтIиссия зу? Хъунмасса? ЦIакьсса? Ххуйсса? Юх. Жура-журасса.
Цанчирча ва мукъуву дур гьарзат: марххаллал тундралия кьиблалул зунттурдайн, паракьатсса тIаннул къатлуя аьлагъужасса мегаполисрайн бияннин. Яла-яларив, ва мукъул мяъна инсантурацIун дархIусса дур. ЛичIи-личIисса миллатирттаясса, личIи-личIисса мазурдий гъалгъа тIисса, амма ца билаятгу, ца кьадаргу, ца тарихгу бусса.
2026-ку шин ляличIисса шин дур. Хъунмасса, чIяву миллатру бусса билаятрал халкьуннал дянивсса дусшиву, дакьаву ва аслахIшиву цIакь даврин хас дурсса. Жула президент Владимир Путиннул 2026-ку шин баян бувну бур Аьрасатнал Халкьуннал цашиврул шинну».
Вай мукъурттий тIиртIунни МахIачкъалалив Поэзиялул театрдануву хьусса «В созвучии сердец и слов» цIанилусса Республикалул ХVI -мур пасихIну шеърирду буккаврил конкурс Аьйша СаэдахIмадовал.
Поэзиялул театрданувун бувкIун бия поэзиялух вичIидишин. Шеърирдах бакъассагу, Аьрасатнал халкьуннал чIурдах вичIидишин.
Конкурсрай гьуртту хьунни Дагъусттаннал личIи-личIисса вузирдавасса ва колледжирттавасса студентътал. Вайннавух бия М. Жамбулатовлул цIанийсса Дагъусттаннал аграрный университетрал, Дагъусттаннал халкьуннал хозяйствалул университетрал, Щалагу Аьрасатнал юстициялул университетрал (РПА.Минюст РФ) Ухссавнил Ккавкказуллал институтрал, Дагъусттаннал педагогикалул университетрал, Р.Аьшураьлиевлул цIанийсса Техникалул колледжрал, Дагъусттаннал медициналул университетрал, Башларовлул цIанийсса медициналул колледжрал студентътал. Жюрилуву бия Дагъусттаннал Чичултрал союзрал правлениялул председатель Марина АхIмадова, «Зунттал хъами» журналданул хъунмур редактор Хамис Шамилова, Дагъусттаннал искусствардал лайкь хьусса ишккакку Зумруд Салимгереева ва м.ц.
Студентътурал бувккунни Буттал кIанттул караматшивриясса, буттахъал чувшивриясса ва Ватандалухсса ччавриясса личIи-личIисса миллатирттал шаэртурал шеърирду.
– Балтий хьхьирил зумания Тихий океандалийн бияннин, ухссавнил микIирттая кьиблалул зунттурдайн бияннин, жу барду поэзиялул путешествие. Ва щалагу жула Аьрасатри. Хъунмасса, жура-журасса, цасса. ЛичIи-личIисса миллатирттал шаэртурал поэзиялул лахьхьин буллай бур жунма чIаххувчунал культуралул хIурмат бан, дусшиву дан, укун караматсса билаятрай ялапар хъанай бушиврия пахру бан, – кIицI лавгунни филологиялул элмурдал кандидат, доцент, Поэзиялул театрданущал конкурсрал сакиншинначи хьусса ПатIи Рамазановал.
Жюрилул лахъсса кьимат бивщунни конкурсрал гьурттучитурал гьунардан. Ххув хьуминнан буллунни Дагъусттаннал Культуралул министерствалул чулухасса дипломру ва арцуйнусса бахшишру. Циняв конкурсантътуран дуллунни сертификатру. Мероприятие лавайсса даражалий дачин дурну тIий, бахшишран лайкь хьунни Аьрасатнал юстициялул университетрал Ухссавнил Ккавкказуллал институтрал 3-мур курсрал студентка Аьйша СаэдахIмадова.
Андриана Аьбдуллаева
