Мукунсса тагьар хьуну дур хъунмурчIин базардаву цаппара журалул дукия гьарза шаврийну.
Дагъусттаннай мартрай шинал инфляция хьуну дур 4,1 %. Ва хIурхIа лаглай дур ряхва зурул мутталий ва личIлай дур аьмну Аьрасатнавумунияр яларайну.
Гьашину, февральданух бурувгун, мартрай багьри лахъ хьуну бур 1%. Интнил цалчинмур зуруй хIисав хьунну кьюркьуну дур нис. Му дархIуну дур региондалул базардаву даххайсса накI ва нис гьарза шаврицIун. Нис дуккан дайминнал транспортрахсса харжлугъгу чан хьуну дур, мунилгу асар биян бувссар нисирал багьа ялавай бутан. Амма шинал мутталий нис ххира хьуну дур 10,4% хьхьичIми цаппара зурдардий мунил багьа лахъ хъанай бивкIун тIий.
Мива ишру сававну мартрай кьюкьлай диркIун дур лагавугу. Аьмну шинал мутталий лагаву ххира хьуну дур чан-кьанну –1,7 %.
Февральданух бурувгун, ахъулсса ва ахънилсса ххира хьуссар сезондалун лархьхьуну. Нувщи, къур, чимус, чIикIунтIа интдайдихьулий республикалийн дучIайссар цайми регионная. Ахънилсса машай дуккан дуллалиминнал багьлувун дичайссар транспортрахсса харжлугъругу, муниятугу лахъ хъанахъиссар ахънилссаннул багьри. Жула кIанттул калан баххан ласлай бур Дагъусттаннал дазул кьатIув, мунияту чан личIлай бур калан жула базардаву, мунийн бувну, лахъ хъанай бур мунил багьагу. Шинал мутталий аьмну ахъулсса ва ахънилсса кьюркьуну диркIссар 11,4 %, хьхьичIмур шинал апрель-май зурдардий багьри ялавай багьлай бивкIун тIий.
ДукIу сезондалул чIумал кIанттул санаториярттайн, бигьалагай къатравун, патирдавун халкь чIявуну бучIаву сававну, мартрай миннул хIаллихшиннугу ххирану лирчIунни. Амма, дукIумур шинал мартрайсса багьрах бурувгун, санаториярттал хIаллихшинну кьюркьуну дур 0,4 %, патирдал хIаллихшинну тIурча, ххира хьуну дур 3,6%.
Мартрай, февральданух бурувгун, мукунна кьюркьунни чил билаятирттавунсса туризмалул хIаллихшиннугу. Чан хьуну бур республикалул дазул кьатIув бигьалаган гъирарайсса жула региондалул ялапарлувтал. Китайнавунсса ва Турциянавунсса аьрххи-ххуллу кьювкьуну бур. Аьмну шинал мутталий чил билаятирттайнсса туризмалул хIаллихшиннугу мукунна кьюркьуну дур.
Билаятрай аьмну инфляция хьуну дур 5,9 %. Аьрасатнал Банкирал ттинияр тихуннайгу арцул ва кредитрал политика дачин дуллай бур, цалий дарцIуну яларайсса инфляция дикIаншиврул.
ХI. Аьдилов
