Майрал 9-нний Каспийск шагьрулул хъун майданнив хьунни Бюхттулсса Ххувшаврил 81 шинан хас дурсса аьралий парад.
Ваний гьуртту хьунни Каспийскаллал Краснознаменный флотилиялул, Аьрасатнал ФСБ-лул дазул управлениялул аьралийтал, национал гвардиялул, ФСИН-далул ва Дагъусттаннал таможнилул парадрал расчетру, Буттал кIанттул цIанийсса Хъунмасса дяъвилул ветерантал, СВО-рал гьурттучитал, республикалул бакI дургьуми.
Парад тIиртIунни Каспийскаллал Краснознаменный флотилиялул хIаписартурал «Священная война» тIисса балайлул музыкалухун майданнийн Ххувшаврил Ттугъ буккан баврийну. Парадрай каялувшиву дуллай ия Каспийскаллал Краснознаменный флотилиялул командующийнал хъиривчув контр-адмирал Анатолий Долгов, парад кьамул дурунни вава флотилиялул командующий вице-адмирал Олег Зверевлул.
Лавай кIицI лавгсса аьралийтуращал трибунардал чIарах ларгунни аьралий хъаннил рота ва «Юнармиялул» парадрал расчет.
Аьрасатнал ФСБ-рал авиациялул личIисса кьюкьлул вертолетирттал ссавруннайх лавсунни Аьрасатнал, Дагъусттаннал ва Ххувшаврил ттугъру.
Дагъусттан Республикалул бакIчинал буржру биттур буллалисса Федор Щукиннул цалва ихтилатраву дакIнин дирчунни АхIмад-Хан Султаннул, МахIаммад ХIажиевлул, Юсуп Акаевлул ва Валентин Эмировлул дурсса виричувшивуртту, чIурчIав дунни хIакьинугу дагъусттанлувтурал Ватандалул хьхьичIсса цалва бурж лайкьну биттур буллай бушиврий. Барчаллагь увкунни хIакьинусса кьининин Каспийскалий увагу ливчIсса Буттал кIанттул цIанийсса Хъунмасса дяъвилул ца ветеран, ва парадрайгу гьуртту хъанахъисса Муса Багьауттиновлухь.
Бадрижамал Аьлиева
