«Звезда нашей Великой Победы» цIанилусса, Хъунмасса Буттал КIанттул цIанийсса дяъвилуву Ххувшаву ларсун 71 шин шаврин хас дурсса дунияллул халкьуннал автопробеграл гьурттучитал апрель зурул 6-нний бувкIунни МахIачкъалалив.

А. Аьбдуллаева
Ва автопробег хъанай дур «Боевое братство» тIисса щалагу Аьрасатнал организациялул проектну. Автопробеграву гьуртту хъанахъими бачинтIиссар аьрали славалул ва Виричу цIа ларсъсса Аьрасатнал шагьрурдайх, мукунма Белорусснал ва Китайнал шагьрурдайх.
Автомарафондалуву гьур­тту хъанахъими МахIачкъалалив бувкIунни Дарбант шагьрулия. Вайннал колонна Ма­хIачкъалалив дирсса савлугъран Ленинский Комсомолданул паркраву хьунни шадлугърал митинг. Ми хьунабакьин бувкIунни Дагъусттаннал патриотический организациярттал, Спортрал, туризмалул ва жагьилтурал иширтталсса буллалисса шагьрулул комитетрал вакилтал, личIи-личIисса школарттаясса дуклаки оьрчIру.
— Гъан хъанай дур Бюхттулсса Ххувшаву ларсъсса кьини. Му Ххувшаву гъан дан Да­гъусттаннал халкьунналгу хъунмасса бутIа бивхьуссар. Дяъвилул цIараву дагъусттанлувтурал хъуннасса къучагъшиву кка­ккан дурссар. Та дяъвилуву талай ивкIсса 180 азара дагъусттанчувнава 94 азара зана къавхьуссар. Вайннал къучагъшиву абадлий дакIний дикIантIиссар, цучIав хъамакъаивтссар ва цичIар хъамакъариртссар. Ва автопробеграйну жува ялун нанисса никиран эбратну хьу­сса жулва вирттал цал уттигу дакIнийн бичлачиссару. Барчаллагь учин ччай ура автопробег­раву гьуртту хъанахъисса цинявннахь. ТIайлабацIу баннав, — увкунни Авгъаннал Ветерантурал координацион советрал председатель, отставкалийсса генерал-майор Оьмар Муртазааьлиевлул.
Автопробеграву гьуртту хъанахъиминнахь барчаллагь тIисса ихтилатру бунни Спорт­рал, туризмалул ва жагьилтурал иширтталсса буллалисса МахIачкъалаллал администрациялул комитетрал председатель Марат Ибрагьимовлул.
— ХIакьину жулва шагьрулий ва дакIний личIансса, агьамшиву дусса иш хьунни. ЖучIанма бувкIунни «Звезда нашей Великой Победы» тIисса патриотический проектраву гьуртту хъанахъими. Жу ххариссару укунсса хъамал Дагъусттаннал аьрщарай кьамул бан. Укунсса акциярттал хъуннасса агьамшиву дуссар. Хъуниминнал хIурмат бушиву, Вирттал дакIний битаву, жулва тарих кIулшиву жучIара кьадру-кьиматрай дикIан аьркинссар. Жунна тачIавгу хъамаритан къабучIиссар жулва буттахъал дурсса виричушиву, — увкунни М. Ибрагьимовлул.
Дербент – Владимир – Моск­ва маршрутрай нанисса «Звезда нашей Великой Победы» автопробеграл каялувчи Артем Кашицыннул барчаллагь увкунни дагъусттанлувтурахь цивппа хIурматрай хьунабакьаврихлу. Ванал бувсунни ва автопробег дайдирхьуния шихунмай шиву гьуртту хъанахъиминнал 30 гьантлул дянив 35 азарда километралул ххуллу битантIишиву, 150 шагьрулийн биянтIишиву.
— Билаятрал ххюва мурцIнияту архIал бувккун дайдирхьу­ссар жул автопробег. Автопробеграл лишанну хъанахъиссар Бюхттулсса Ххувшаврил ЯтIул ЦIуку. Жу лавсун бувкIру зун бахшишран та Бюхттулсса Ххувшаврил ттугълил копия. Барчаллагь МахIачкъала шагьрулул агьалинан, мукIруну ура Да­гъусттаннал цинявппагу шагьрурдай жува укунма ххарину кьамул баншиврийн, — увкунни Артем Кашицыннул.
Хъирив автопробеграву гьуртту хъанахъиминнал ххал бунни Аьрали славалул музей. МахIачкъалалия автопробеграл колонна гьантIиссар Хасаврайн ва Къизлардайн.
Автопробег къуртал хьун­тIиссар май зурул 6-нний Мос­кавлий Поклонный зунттуй.