Ва нюжмардий, дунияллийцири бусурман агьлу кунма, Дагъусттаннал агьалигу Зумаритавал байран дуллай, кунначIан кув занай, куннал кув барча буллай, бахшишру дуллай, бугьарами рязи буллай, мюрщими ххари буллай булувкьуну бия.

Гьашину МахIачкъалалив байрандалул хIурматран чIюлу бувсса кIичIиртту чIявусса бунуккива. МахIла-махIлардува оьрчIи-чIюлу бувну, чун багьарчагу, гьаваллавува байрандалул хIахI асар хъанай бия. БувчIлайгу, чIалайгу бия ялу-ялун байран лахъа-хъунну хьунадакьлан ччиминнал аьдадгу хъун хъанай душиву. Дия салютру, фейерверкру. Гьаннайсса, унгу-унгунусса байран.
Байран-кьини кIицI лагаврил хIакъи­раву биялсса аваза бувтшиврия ссихI дукканмагу ччай бакъара, букканна хъирив номерданий му иширайнгу. Так кIицI лаганна, хъуниминнал бяст-ччаллийсса ихтилатру хьурчагу, даталул аьщуй-ххуттай бацIаврил кIибищаву мюрщи оьрчIан барачат хьуну, кIива гьантлийсса байран хьушиву.

Аьрасатнал президент Владимир Путиннул, бусурман агьлу барча буллай, кIицI лавгуна, Аьрасатнал бусурманнал ппухълуннал рувхIанийсса ирс-ххазиналул ва авадансса тарихрал хIурмат хъунмасса бушиву, хъуниминная дирсса аьдатру цIакьну дуручлай бушиву, жагьилминнангу ми лахьхьин дуллай, цIакьну диндалул ххуллу-ххуттай бавцIуну бушиву. Аьрасатнал ХIукуматрал хъунама Михаил Мишустиннулгу чIурчIав дурна, Аьрасатнал уммалул, рахIму-цIимилул, аьдилшиврул ва гуманизмалул гьанурдай цIакь хьусса исламрал хIакьсса ххазинарду маш­гьур баврил ххуллий хъуннасса даву дулла­лишиврий ва СВО-лий гьуртту хъанахъиминнан ва миннал кулпатирттан ка-кумагру буллай бушиврий.

Байрандалул кьинирив Дагъусттаннал муфти, Аьлимтурал советрал председатель, щайх АхIмад-хIажи Аьбдуллаевлул къатрачIан нех дирхьуну агьали най бия. Шиккува кIицI лаганна, гьашину хъаннинсса урцIигу личIину тIиртIуну диркIшиву, гьашинунин хъами Зумаритавал байран барча дуван ва кьини муфтинал ужагърайн буххайсса аьдат къадиркIшиву.
МуфтиначIан бувкIминнавух ия Да­гъусттаннал ХIукуматрал хъунама Аьбдулмуслим Аьбдулмуслимовгу. Ванал хъунма­сса кьимат бивщуна республикалий дакьаву, нахIушиву дуруччаву мурадрай Муфтиятрал дуллисса даврин. Мукунма Рамазан зуруй дуллалисса хъиншивурттан. Муфти барча уван бувкIцириннавух бия Дагъус­ттаннал виваллил иширттал министр Аьбдурашид МахIаммадов, МахIачкъалаллал мэр Юсуп Умавов, вузирдал ректортал, дунияллул ва олимпий чемпионтал ва цаймигу бусравсса инсантал. ЧIявуминнал зумусса дуаьгу дия ялунчIингу, тихуннай чIярусса шиннардийгу зумарду дугьлансса кьудратгу, цIуллушивугу Аллагьнал дулуннав, щалларагу дунияллий паракьатшиву хьуннав тIисса.

Вай дуаьрдацIун бакьлай, халкьуннал дакIурдиву цIими ххи баннав, иман цIакь хьуннав, уттисса Зумаритавал байран СВО-лийсса цинявннал ичIура, шаппаминнащал хьунадакьиннав тIий бура.

ПатIимат Рамазанова