Вай гьантрай «Каспий» санаторийливсса динийсса жагьилтурал форумрал лагрулий «Жагьилсса теологнал школа» тIивтIунни. Ванил сиптачитал бур Дагъусттаннал гуманитар институт ва исламрал культуралул, элмулул ва кIулшиву дулаврил фонд.

Дайдихьу дуллалисса махъ лахълай, национал политикалул ва диндалул иширттал министр Энрик Муслимовлул кIицI лавгунни, мудангу жагьилтурал тарбиялул даврих дагьайкунсса къулагъас дикIан аьркиншиву, кулпатрал, диндалул аьдатрайсса ххазинардал хIурмат буну ми тарбия хьуншиврул.
– Амма махъсса ппурттуву ягин хъанай бур аслийсса ххазинардайнсса гьужумру, жулва жагьилтал бяйкьин бувансса хIарачат чIалай бур, теологтурал хьхьичI бавцIусса ца агьаммур масъалагу, жагьилтуран ссаву ци буссарив бувчIин бувну, бяйкьу ххуллийн кIункIу хьун къабитавур, – увкунни ванал.

Информациялул ва печатьрал агентствалул хъунама Аьбдуразакь Жамалуттиновлул кIицI лавгунни, социал сетирдай бяст-ччаллил хIакъиравусса пикрирду ккалаккиний, итталун багьайшиву къуркъану пикри аьч буллалими. Ва кIану хIисавравун лавсунгу багьайний багьайкун, аьщуйн щунну махъ учин кIулсса жагьилтал аьркинну бушиву.
Муфтиятрал Советрал каялувчи Аьбдулла Салимовлулгу кIицI лавгунни, дин цIакьлин дургьуну, терроризмалул ва экстремизмалул гьужумирттан ххуллу ласун ччисса гужру бушиву, хаснува СВО-лул темагу хIала дуллай, мунияту, цIакьсса кIулшивуртту хIуччарду хIисаврай хьхьичIун ласлай, бяйкьлакьими бакIрай бацIан бувансса кумаг аьркинну бушиву, теологтурал школалиягу, форумраягу гьуртту хьуминнан къакIулмур лахьхьинтIишиву. Вава мяъна-мурадрайсса ихтилат бунни республикалул кIулшивуртту дулаврил ва элмулул министрнал хъиривчу ХIажимурад МахIаммадовлулгу. Гуманитар институтрал ректор НухIкьади БахIмудкьадиевлул балжину бувсунни форумрал тарихрая, мурадрая.

ПатIимат Рамазанова