Дагъусттаннай хьунни террорданийн къарщину бацIаврин хас бувсса республикалул форум. Шикку гьуртту хьунни муниципал къуллугъчитал, кIулшивуртту дулаврил идарарттал зузалт, спортшколардал тренертал ва цаймигу терроризмалул идеологиялун ххуллу кьукьаврил давриву гьурттусса пишакартал. Форумрал сакиншинначину хьунни Дагъусттаннал Миллатирттал политикалул ва диннал иширттал министерство.
Цалчинсса кьини зий бия, шанма секциялийх бавчIуну. Секциярдал лагрулий, Москавлия, Санкт-Петербурграя, Пятигорскалия, Калининградрая ва цаймигу шагьрурдая бувкIсса ва шиччавасса хьхьичIунсса экспертътал буслай бия кIантту-кIанттурдай профилактикалул даву дачин дансса ттизаманнул кьяйдардая. Ххал бивгьунни муниципалитетирттал ва республикалул Террорданийн къарщисса комитетрал аппаратрал хIала-гьурттушиврул, иш багьни, чIумуй хъирив бизаврил масъалартту. Ва секциялул модераторталну бия НАК-рал (Национальный антитеррористический комитет) группалул каялувчи Виталий Малышев ва Дагъусттаннайсса Террорданийн къарщисса комитетрал жаваблувсса секретарь Марат Расулов. Тарихрал элмурдал кандидат, дунияллул халкьуннал дянивсса арардал ва кьатIаллил политикалул кафедралул доцент, дунияллул халкьуннал дянивсса ахттаршиннардал институтрал (МГИМО) хьхьичIунсса элмийсса зузала Сергей Маркидоновлул кIицI лавгунни дунияллийсса ишру ва информация региондалул вивсса иширттайн, миллатирттал ва диннал дянивсса арардайн асар хьун бюхъайшиву. Мунияту, нигьачIийсса тагьар хIасул хьусса чIумал, хъирив бизаврицIун, му хIасул дан багьана хьунсса иширттангу ххуллу кьукьин аьркиншиву. Гьаз бунни балугъравун къабивминнал тарбиялул масъалагу. Гьурттучитал буслай бия социал сетьру ва машгьурсса мессенджердавусса каналлал балугъравун къабивсса оьрчIру-душру хъяврин буллалаврия, оьрчIал коллективирдавусса арардая, питна хьун бюхъайсса тагьар ччяни кIул даврия.
Ца секциялул даву хас дурну дия, духовенствагу кIункIу дурну, жяматращал ва жагьилтуращал дуллансса даврин. Гьурттучитурал ихтилат хьунни цукун, ссайну кIул бантIиссарив аьркин бакъасса иширттавун кIункIу хьусса жагьилтал, ци чаран лякъинссарив миннал дянив экстремизмалул пикрирду ппив хьун къабитан. Ва секциялул модераторну ия Дагъусттаннал университетрал Координациялул центрданул каялувчи МахIаммад МахIаммадов. Шикку гьуртту хьунни Чачаннавасса, Ингушетиянавасса хъамал, Дагъусттаннал Национал политикалул министерствалул, духовенствалул, вузирдал ва жяматийсса организациярттал вакилтал. Чачаннавусса опытрая бувсунни ЧГУ-лул Координациялул центрданул директор Ренат Мукаевлул. Экспертътурал ххал бивгьунни фейкру ппив баврил, тIайла бакъасса информациялул тагьар оьлукъин дуллалаврил масъалартту. Жяматращал ва жагьилтуращал зузисса пишакартуран мюнпатсса маслихIатру бунни. Гьаз хьусса масъаларттал хIасиллу дуллай, кIицI лавгунни ва ххуллий паччахIлугъгу, духовенствагу, кIулшивуртту дулаврил ва жяматийсса организацияртту цачIуну зун аьркиншиву.
Ца секциялул даву хас дурну дия информациялул майданнив терроризмалул идеологиялийн къарщи бацIаврил аралун. ­Аьрасатнал хьхьичIунсса элмийсса ва кIулшивуртту дулаврил центрдал экспертътурал бувсу­нни радикал информация ппив баврил ттизаманнул механизмардая ва жагьилтуращалсса профилактикалул даврил кьяйдардая, заралсса информациялущал ччалли буккансса контент сакин даврия. Секциялул модераторну ия Дагъусттаннал Цифрардал лябуккулул, информациялул ва печатьрал министерствалул зузала Шамил Нажмуттинов. Стратегиялул ахттаршиннардал ва прогнозирттал институтрал ( Аьрасатнал Халкьуннал дусшиврул университет) директорнал хъиривчу, «Метаметрика» проектрал ва «Звезда» каналданул вакил Виктория Федосовал кIицI лавгунни къалмакъаллу дансса площадкану хъанахъишиву социал сетьру. Мяйжаннугу хьусса ишру фейкирдан ва провокациялул публикациярттан ишла бан бюхъайшиву. Мукун зузиминнан яла къулаймургу ми­ллатрал, диндалул ва миграциялул тема душиву.
Цала практикалул опытрая бувсунни И.Кантлул цIанийсса БФУ-лул (Балтийский федеральный университет) Координациялул центрданул хъунама Михаил Авакъяннул. Ва центрданул дузрайн дуккан ду­ллай бур экстремизмалул ва терроризмалул профилактикалул хIакъиравусса студентътурал проектру. Миннувух бур ­оьрус мазрайсса ва ингилис мазрайсса онлайн-курсру, мукунма Аьрасатнал личIи-личIисса регионнаясса студентътурансса арулва гьантлийсса хакатон (IT-лул пишакартурал командалул бяст-ччал).
Секциярдал даву къуртал хьуну махъ хьунни микку гьаз бувсса масъаларттал хIасиллу дуллалисса пленар заседание. Шикку гьуртту хьусса Дагъустаннал бакIчинан кIанайсса Федор Щукиннул заседание тIитIлай, кIицI лавгунни хIакьину террорданиясса нигьачIаву хъунмурчIин информациялуцIун, обществалун нигьачIаву дусса пикрирду ппив баврицIун, жагьилтал вай иширттавун кIункIу баврицIун дархIусса душиву.
– Радикал пикрирду, щялмахъру, провокацияртту, инсантурал оьрмулувусса захIматшивуртту ва миннал дакIнивусса пашмансса асарду ишла баву – ва бур терроризмалул цIусса ярагъ. Жунмагу аьркинссар, кулпат, школа, власть, духовенство, жямат ва СМИ цачIун хьуну, вайннайн къалханну бацIан, – кунни Федор Щукиннул. Политикалул социологиялул центрданул элмийсса зузала, профессор (НИУ ВШЭ) Алексей Токаревлул кIицI лавгунни, форумрай вай масъалартту гьаз баву бакъассагу, пишакартурахь практикалий ишла дансса технологиярттая ва хIукмурдаягу бусан аьркиншиву.
Дагъусттаннал Национал политикалул ва диннал иширттал министр Тамерлан АбутIалимовлул кIицI лавгунни форумрал ттиния тихуннай жяматращал дуллансса профилактикалул даврил гьану бивзшиву.
Лажин хIадур дурссар
Андриана Аьбдуллаевал