Сентябрьданул 14-нний, Дагъусттаннал Халкьуннал цашиврул байрандалул хьхьичIмур кьини, республикалул бакIчинал чIумуйнусса кIанайма Федор Щукиннул паччахIлугърал наградартту дуллунни хьхьичIунсса дагъусттанлувтуран.«ХIакьину жува бавтIун буру личIинурасса байрандалул–Дагъусттаннал Халкьуннал цашиврул байрандалул хьхьичIмур кьини. Ванил жунма дакIнин бутлатиссар сайки 300 шинал хьхьичI, Дагъусттаннал жула ­аьраллу цачIун хьуну, чапхунчитал дардагъил бувну бивкIшиву. Жунма дакIнийссар 1999 шинал хьуну бивкIсса ишругу, га чIумалгу дагъусттанлувтал цIунилгу гьаз хьуну бивкIссар жула улча буруччин, ккаккан дурссар чувшиву ва къучагъшиву», – увкунни Федор Щукиннул.
Ванал тIимунийну, халкьуннал цашиву аьям шайссар, кьини дурксса чIумал дакъассагу, гьарца оьрчIан за лахьхьин буллалисса, оьрмурду ххассал буллалисса, культура ядуллалисса, аьмсса къатта – Дагъусттан цIакь буллалисса инсантурал захIматравугу. Гьамин, муниятур, региондалул бакIчинал мукъурттийн бувну, ва кьини республикалул цIанияту хьхьичIунминнаватугу хьхьичIунми хIурматрай бавтIун, хIурматрал махъругу куну, барчаллагьгу учайсса.
Федор Щукиннул личIину кIицI бунни кIунттихь ярагъуннищал талай бивкIми. Барчаллагьрал махъру увкунни СВО-лий гьуртту хьуминнахь.
Мероприятиялул ахирданий Федор Щукиннул уттигу цал цинявннахь барча дунни Дагъусттаннал Халкьуннал цашиврул кьини, чIа увкунни ванияр тихуннайсса хьхьичIуннайшивуртту, цIакьсса цIуллушиву ва чIал дакъасса ххувшаву.
Кулпатрал институт цIакь бавриву лайкь шаврихлу ва 10 оьрчI тарбия баврихлу Асият Дибирован дуллунни орден «Нину-виричу».
Культуралул ва магьирлугърал бутIуву «Заслуженный работник культуры Российской Федерации» тIисса хIурматрал цIа дуллунни Дагъусттаннал лайкь хьусса къавтIаврил «Лезгинка» ансамбльданул балетмейстер-постановщик Нелли Мусаеван. Дагъусттаннай щинахьхьун лагаврил биян бувсса зараллу бухлаган бавриву бивхьусса захIматрахлу АьФ-лул Президентнал чулухасса Барчаллагьрал чагъар буллунни волонтертуран Зарема Аьбдуллаеван ва Сяид Абумуслимовлун. Аьралуннал бурж биттур буллай чувшиву ва къучагъшиву ккаккан даврихлу «За проявленное мужество» тIисса медаль дуллунни сержант Аьбдул-Жабар Рзахановлун ва хъунама сержант Низам Садиховлун. Дагъусттан Республикалул ХIурматрал грамота дуллунни 3-мур ранграл капитан Иван Морозовлун.
ПаччахIлугърал мюхчаншиву цIакь давриву бувсса кумаграхлу отставкалийсса генерал-майор Аьзизбаг Чересовлун дуллунни «За проявленное мужество» тIисса медаль.
Жула лакрал миллатрал арс АьбдурахIман Адамовлун дуллунни «Заслуженный работник в сфере обслуживания» тIисса хIурматрал цIа. Наградартту дуллунни цайми-цайминнангу.
ХIадур бувссар
ХI. Аьдиловлул