Сентябрьданул 15-нний АьФ-лул Федерациялул Советрал председатель Валентина Матвиенко къуллугърал аьрххилий бувкIунни Дагъусттаннайн.

Дагъусттаннал бакIчинал буржру чIумуйну биттур буллалисса Федор Щукиннущал цачIу ва лавгунни МахIачкъалаливсса АьФ-лул Обороналул министерствалул Хьхьирил аьралуннал госпитальданийн.
Ттизаманнул медициналул идара бувну бур Каспий хьхьирил зуманив. Ванил лавайсса даражалул медициналул кумаг буллай бур аьралитуран ва миннал кулпатирттан.
Валентина Матвиенко личIину хьунабавкьунни Федор Щукиннущал. Ялувмур палаталул спикернал тIимунийну, Федор Вячеславович бакIчинал кIанайманал къуллугърай итаву хьуссар республикалун къабигьасса чIумал, инфраструктуралунгу, социал объектирттангу, инсантурал къатрангу тамансса зараллу хьусса тагьарданул чIумал.
«Ина чялишну хIала увххунна давурттавух. Вил каялувшиврийну команда зий дур инфраструктура ва социал объектру дузал бавриха. КIира зунттал шяраву зий байбивхьунни кIива цIусса школа, ина инсантуран кумаг буллай ура къатри цIу дуккан дуван ва къатри леркьсса кIанттурдайсса инсантал тIювардал сертификатирттал дузал буван», – увкунни ванил.
ФС-рал председательнал пикрилий, ДР-лул Верховный Судрал каялувчинал опытрайну Федор Щукиннуща бюхълай бур циняв масъалартту лябукку буну щаллу буллан.
Республикалул бакIчинал кIанайма мудана хьунаакьлай ур республикалул ялапарлувтуращал, хIала-гьурттуну зий ур властьрал федерал органнащал.
«Министерстварттан ва ведомстварттан бувчIлай бур республикалий тамансса захIматсса масъалартту салкьи хьуну бушиву, ми дузал бувангу бюхъан тIий бушиву так федерал центрданул кумаграйну. Федерациялул Совет хIадурссар мудангу кумаг буллан зул давурттуцIун», – увкунни Валентина Матвиенкол.
Федор Щукиннул барчаллагь увкунни республикалух даинсса къулагъас дуллалаврихлу.
«Жун кIулли зу жул агьамсса сиптардацIун кабакьу байшиву. Жула цIанасса ихтилатгу хъанай бур Дагъусттаннал миллатирттал Цашиврул кьини – ва байрандалул дакIнин бичлачиссар жува циняв цачIун буллалисса ххазинартту», – увкунни региондалул каялувчинал.
Ванал цала хьхьичIсса масъаларттая буслай, кIицI лавгунни региондалул циняв программартту бартдигьлай бушиву, амма миккугу аьркинну бур анавар буккан ва луртанну лякъин.
Федор Щукиннул гьартану бувсунни республикалийсса жагьилтурал политикалия, дуккаврил ва жагьилсса пишакартал давурттал дузал баврил масъаларттая.