МахIачкъалалив, Лениннул комсомолданул паркравусса Аьраличунал гьайкалданучIа, хьунни Моряк-подводникнал кьинилун хас дурсса, Совет Союзрал Виричу, кIилчинмур ранграл капитан, Ухссавнил флотрал щинал вих буххай жамирдал дивизиондалул командир МахIаммад ХIажиев дакIнин утлатисса акция.

Шикку гьуртту хьунни «Единая Россия» партиялул, «Молодая гвардия» суккушиннарал активистътал, кIулшиву дулаврил ва жяматийсса идарарттал вакилтал, кадетътал, хасъсса аьралий операциялул гьурттучитал, Виричунал гъан-маччами.
МахIаммад ХIажиевлул оьрмулия, Буттал кIанттул цIа­нийсса Хъунмасса дяъвилий ванал ккаккан дурсса чувшивурттая бусласисса ихтилатру бунни Дагъусттаннал Ветерантурал советрал председатель МахIарам Аьлиджановлул, «Молодая гвардия Единой России» суккушиннарал региондалул отделениялул каялувчи Сергей Никитиннул, МахIаммад ХIажиевлул цIанийсса заводрал генеральный директор Аьбдулвагьаб Папалашовлул, шагьрулул Депутатътурал мажлисрал председательнал хъиривчу МахIаммад МахIаммадовлул, МахIаммад ХIажиевлул цIанийсса заводрал Ветерантурал советрал председатель Шамил Мусаевлул. МахIачкъалаллал 35-мур гимназиялул дуклаки душнил бувккунни шеъри.
Буттал кIанттул цIанийсса Хъунмасса дяъви байбивхьусса чIумал жула хьхьирил ­флотрал бивкIун бур 212 жами. Миннува­сса цаннил командирну МахIаммад ХIажиев ивкIун ур. ЦIанасса чIумал Аьрасатнал стратегиялул ярагъунниву подводный флот бур ца яла гуж бумур.
МахIаммад ХIажиев хьуну ур Совет Союзрал Виричунал цIа ларсъсса цалчинсса дагъусттанчу.
Ихтилатру къуртал хьуну махъ гьурттучитурал тIутIив дирхьунни М.ХIажиевлул гьай­калдануцI, баян бунни минутI­райсса пахъ багьаву.
Андриана Аьбдуллаева