Вай гьантрай ЦIуссалакрал райондалул Халкьуннал Мажлисрал председатель Аслудин Аслодиновлуйн хасъсса аьралий операциялул гьурттучитуран кумаг баврихлу Барчаллагьрал чагъар буллунни. 70-мур мотострелковый полкрал аьралитал барчаллагь баян буллай бур хасъсса аьралий операция наниссаксса хIаллай гуманитар кумаг буллалисса Аслудин Аслодиновлуйн.
– ДакIнийхтуну асар хьунни жухара дуллалисса аякьа.
ХIакьинусса кьини ина кунма чумартсса инсантурал дуллалисса давурттан багьа бакъассар. Зу кунмасса патриотътал махъ буссаксса, ххувшаву ласунсса вихшалагу цIакь хъанай дур. ЧIа тIий буру вин гьарица ишираву тIайлабацIу.
ЛичIинува барчаллагьрай ур полкрал командир, гвардиялул полковник А. Хабилов, – тIий чивчуну бур аьралитурал бувкIсса Барчаллагьрал чагъарданий.
Ва бакъассагу, Аслудин Аслодиновлун дуллунни «Операция по денафикации и демилитаризации Украины» тIисса, СВО-лийсса аьралитуран чялишсса кумаг буллалисса инсантуран дулайсса медаль. Аслудиннун ва медаль дуллунни 58-мур полкрал аьралуннал командованиялул чулуха.
Шиккува кIицI лаган, Украиннал аьрщарай хасъсса аьралий операция байбивхьуния шийнмай, Аслудин ва ванал уссурвал буссар дуки-хIачIия, автотранспорт, москитный сеткарду, рацияртту, прицепру, генераторду ва аьралитуран аьркинсса цаймигу кьай-кьуй тIайла дуклай. Хасъсса аьралий операциялул гьурттучитуран бакъассагу, миннал кулпатирттангу цикссагу кIицI лагансса кумаг бувссар ва буллайнма буссар уссурвал Аслодиновхъул.
Хасъсса аьралий операциялий гьуртту хъанахъисса аьралитуран кумаг баврихлу, Аслудин цимилагу лайкь хьуссар аьралий командованиялул ва ДР-лул бакIчи Сергей Меликовлул чулухасса Барчаллагьрал чагъардан.
Буниялагу барчаллагьран лайкьссар къучагъну аьралий буржру бартбигьлагьисса жагьилтурал махъ бацIан хIадурсса уздансса инсанталгу.
