ЦIанихсса ватанлув дакIнин увтунни
Совет Союзрал Виричу Муса Маннаровлул цIанийсса Гъумучиял Тарихрал ва краеведениялул музейраву хьунни хьхьичIунсса инженер-конструктор, Совет Союзрал паччахIлугърал премиялул лауреат, РСФСР-данул лайкь хьусса изобретатель ХIажи-Апанни Чалавиев дунияллийн увккун 100 шин шаврин хас дурсса мероприятие.
Ваний гьуртту хьунни райондалул бакIчинал хъиривмур Эльмира МахIаммадова, КIулшиву дулаврил управлениялул каялувчи Сулайман Шахмилов, Совет Союзрал Виричу Муса Маннаровлул цIанийсса Гъумучиял школалул директор Соня Макаева, учительтал ва дуклаки оьрчIру, гъан-маччами. Мероприятие тIитIлай, музейрал хъунмур Аьбидат Макаевал бавтIми кIул бунни хьхьичIунсса конструкторнан хас дурсса экспозициялущал.
Ванил бувсунни ХIажи-Апанни Чалавиевлул оьрмулул ва захIматрал ххуллия, буттал кIанттул машинартту итабакьаву хьхьичIунмай бавриву бивхьусса захIматрая. Муния махъ ккаккан дурунни ХIажи-Апанни Чалавиевлун хас дурсса документал фильм.
ХIажи-Апанни Чалавиев увну ур 1926 шинал октябрьданул 27-нний Гъумук. 1955 шинал къуртал бувну Н. Э. Бауманнул цIанийсса Москавуллал лаваймур технический университет. 1988 шинайннин зий ивкIун ур Москавуллал областьрайсса Коломна шагьрулий машинартту итабакьайсса конструктортурал бюрорай, цIубутIуй инженер-конструкторну, яла хъунама инженер-конструкторну, лабораториялул каялувчину, отделданул каялувчину, яла цуппа бюрорал каялувчину. Ванал итадаркьуну дур ряхцIаллий шанна даву.
Ванал гьурттушиндарай ххалгу дурну, итадаркьуссар «Малютка», «Малютка-П», «Штурм», «Атака», «Шмель» тIисса танкардайн къаршисса ракетарттал комплексру; «Стрела-2», «Стрела-2М», «Стрела-3» тIисса ца кIанттая цамур кIанттай ласайсса зенитный ракетарттал комплексру, тактический ракетарттал комплекс «Точка», оперативно-тактический ракетарттал комплекс «Ока».
Лайкь хьуну ур Лениннул, «Знак Почёта» ва ЗахIматрал ЯтIул Ттугълил орденнан.
Эльмира МахIаммадовал кIицI лавгунни лак багьавай пахрулий бушиву ХIажи-Апанни Чалавиевлуя.
«Ганал гьунарданун ва захIматран билаятрал бивщуну бур лавайсса кьимат. Укунсса журалул мероприятияртту дуллан аьркинссар дуклаки оьрчIругу гьурттуну, ялун нанисса никиран хавар бикIаншиврул жула миллат лавай бувсса ватанлувтурая. Жуйра хъунасса жаваблувшинна дуссар, лайкьсса ник тарбия дан», – увкунни ванил.
«ОьрчIал хьхьичI дикIан аьркинссар хIакьсса эбрат. ХIажи-Апанни Чалавиев Гъумуча увккун, хьуссар билаятрай ца яла хьхьичIунсса конструктор, цал ххал дигьавурттал билаятрал обороналул каширду цIакь дан бювхъусса. Вайннал эбратрай хъуни хъанан аьркинссар хъирив нанисса никру», – увкунни КIулшиву дулаврил управлениялул каялувчи Сулайман Шахмиловлул.
«ХIакьину жува дакIнин утлай буру билаятрал обороналул элму ва техника хьхьичIуннай давриву ккалли бансса захIмат бишаврийну буттал улклул цIа дуккан дурсса инсан. Жунма педагогтуран, ва, хаснува жула оьрчIан, ХIажи-Апанни Аьбдул-ХIамидовичлул биография хьуссар захIматрал хьхьичIунмай бувсса гьунарданул, язи бувгьусса пишалухсса ччаврил тарих баххана бан бюхъайшиву ккаккан буллалисса мисалну.
Жун ччива, хIакьину жучIава дуклакисса оьрчIан Чалавиевлул цIа кIулшивруцIун, зунттал шярава увккун СССР-данул паччахIлугърал премиялул лауреат хьунцIа ванал цукун бигьабакъасса ххуллу бивтссаривгу бувчIин. ХIажи-Апанни Аьбдул-ХIамидович жула дакIурдива къуккантIиссар», – увкунни Гъумучиял школалул директор Соня Макаевал. Школалул коллективрал цIания ванил барчаллагь увкунни мероприятие сакин дурминнахь.
«Жу дакIнийхтуну барчаллагьрай буру ХIажи-Апанни Аьбдул-ХIамидовичлул аьпалул хIурмат буручлай бушиврухлу, ганал оьрмулия ва захIматрая жагьилсса никирахь буслай бушиврухлу», – увкунни ХIажи-Апанни Чалавиевлул уссил арснал арснал Чалавил.