Июньдалул 22-нний МахIачкъалалив Дусшиврул къатлуву хьунни хасъсса аьралий операциялий гьуртту хъанахъиминнан хас бувсса конференция. Шикку бувсунни хасъсса аьралий операциялий гьуртту хъанахъиминнан кабакьу буллансса «Память гор» тIисса жяматийсса организациялул даврия.
Шикку гьуртту хьунни республикалул каялувчитал, министртал, депутатътал, хасъсса аьралий операция нанисса кIанттава бигьалаган бувкIсса аьралитал, жяматийсса ккураннал вакилтал, цайми регионная бувкIсса хъамал ва волонтертал.
Мероприятие дайдирхьунни «Защитники Отечества. Время выбрало нас!» тIисса фильм ккаккан даврия.
Республикалул бакIчи Сергей Меликовлул кIицI лавгунни хасъсса аьралий операциялий талатиминнал, вайннал кулпатирттал ва ватандалул ххуллий жанну дуллуминнал кулпатирттал чIарав бацIаврияр хьхьичI кIанттайсса мурад хIакьину цамур бакъашиву ва му баврил ххуллий зий душиву властьрал органну. Бувсунни Аьрасатнал президент Владимир Путиннул сипталийну сакин бувсса «Защитники Отечества» фондрал даврия. Барчаллагь увкунни передовойлий талатиминнан кумаг тIайла буклакисса «Инсан», «Надежда», «Чистое сердце» ва цаймигу ихIсандалул фондирттахь ва ми фондирттал давривух хIала бухлахисса республикалул агьалинахь.
«Пахрулий ура жула ялун нанисса никирая – жула аьралитурал дакIру дансса чагъарду, суратру тIайла дуклакисса оьрчIая ва душварая. Жун чIалай бур цукун чялишну чIарав бацIлай буссарив жулва дагъусттанлувтал хасъсса аьралий операциялий гьуртту хъанахъисса «Каспий» батальондалун ва цаймигу аьралий подразделениярттан кумаг тIайла буклакисса иширттал. Цимирагу азардахъул тоннарду гуманитар кумаграл най дур аьралий ишру нанисса кIанттайн», – увкунни Сергей Меликовлул.
Барчаллагьрай кIицI лавгунни хасъсса аьралий операциялий ватандалул ххуллий жанну дуллуминнал аьпа абад баврил ххуллий хъуннасса даву дуллай бушиву ливтIуминнал ниттихъул, щахъами, ссурвал.
Муниципалитетирттал каялувчитурайн оьвчаву дурунни хасъсса аьралий операциялий гьуртту хъанахъиминнал хьуннав, ватандалул ххуллий жанну дуллуминнал кулпатирттал хьуннав буруккинтту ччясса мутталий щаллу буллан.
«Память гор» жяматийсса организациялул каялувчи МахIач Шамиловлул барчаллагь увкунни Дагъусттаннал бакIчинахь, жяматийсса организациялун буллалисса кумаграхлу.
«Жунма цинявннан багьлай бур, цинявппа цачIун хьуну, куннал чIарав кув бацIлан, аьрай бакъасса, къинттуллухгу. Организациялул кумаг буллантIиссар ятIа-тIар бакъаминнах луглагавривугу. Мунил ялув дакIний буссару тIитIин диспетчерский служба, психологиялул зумунусса кумаг буллансса центр.
Барчаллагь хьуннав жул даврил чIарав бацIлацIиминнан: волонтертуран, властьрал органнан. Зул кумаг жун даингу асар хъанахъиссар. ЦачIу жущара чIярусса давуртту дан бюхъантIиссар – мури тIайлабацIулийнсса ххуллу», – увкунни Шамиловлул.
Ихтилатру бунни хасъсса аьралий операциялул вирттаврал ва жяматийсса ишккаккултрал.
«Живая классика» тIисса ХIII-мур дунияллул халкьуннал дянивсса конкурсрал суперфиналданий ххув хьусса ЦIуссаккуллал 2-мур школалул дуклаки оьрчI Сиражуттин АхIмадхановлул дурккунни СВО-лий гьуртту хъанахъиминнан хас дурсса назму.
Сергей Меликовлул ва МахIач Шамиловлул жавабру дуллунни республикалул ва федерал СМИ-рдал журналистътурахьхьун.
Конференциялул лагрулий зий бия ххюва секция, микку ххалбигьлай бия хасъсса аьралий операциялий гьуртту хъанахъиминнан ва вайннал кулпатирттан социал кумаг баврийн багьайсса суаллу (медициналул, кIулшиву ласун ва бизнес тIитIин, дагьайсса аьрщи ласун).
Конференциялийн бувкIми хъамалу буллай бия Каспийскаллал флотилиялул аьралий кухнялул цIигьур Бадруттин Савзиевлул бувсса гречкалул кашалий ва Къизлардаясса меценат ГъазимахIаммад ГъазимахIаммадовлул бувсса пулаврай.
Зулайхат Тахакьаева
