Ноябрьданул 13-нний Дагъусттаннай дайдирхьунни халкьуннал шаэр МахIаммад АхIмадовлун хас дурсса, регионнал дянивсса Ккавкказуллал поэзиялул цалчинмур фестиваль «Ххирар ттун Кавказ».

Ваний гьуртту хьун Ма­хIач­къалалийн бувкIун бия Аьрасатнал цIанихсса чичулт, Аьрасатнал Чичултрал союзрал цалчинма секретарь Геннадий Иванов, вава Союзрал секретарь Иван Голубничий, Къабардин-Балкьарнал халкьуннал шаэр Муталип Беппаев, Ярославль шагьрулиясса шаэр Евгений Чеканов, Ростовраясса «Доля» журналданул редактор Ольга Прилуцкая, Чачаннавасса, АьсатIиннавасса ва чIаххуврайсса республикарттаясса цаймигу машгьурсса чичулт.
Вара кьини Поэзиялул театрдануву хьунни МахIаммад АхIмадовлул назмурду личIи-личIисса мазурдий ккалаккисса, шаэр дакIнин утлатисса мажлис. Хъирив кьини делегация бивунни Гъуниннал райондалийсса, халкьуннал шаэр увсса ва увччусса Гонода шяравун. Дуклаки оьрчIал ва мажлисрай дюхханну дурккунни шаэрнал назмурду. Хъирив гьантрай МахIачкъалалив, Расул ХIамзатовлул цIанийсса музейраву ва Поэзиялул театрдануву дагъусттаннал жагьилсса автортал хьунабавкьунни цIанихсса чичултращал, хьунни таржумалул мастер-классру ва литературалул агьамсса масъалартту гьаз буллалисса ихтилатру. «ЧIярусса шиннардий халкьуннал шаэр ва жяматийсса ишккакку МахIаммад АхIмадов Дагъусттаннал Чичултрал союзрал даврий каялувшиву дуллай уссия. Ванал Аьрасатнал чIявусса шагьрурдай машгьурсса чичулт-дустал, гьалмахтал бия: Геннадий Иванов, Валерий Латынин, Иван Голубничий, Чачаннал халкьуннал чичу Канта Ибрагьимов, Ингушетиянал Чичултрал союзрал хъунама Хаваш Накостоев, вава Ингушетиянал халкьуннал шаэр Раиса Дидигова, Нальчикраясса, Ростовраясса цIанихсса чичулт.
Вай циняв Дагъусттаннайнсса аьрххилул дакIру ярг дунни, авадан дунни тIий, республикалий ца уттигу поэзиялул фестиваль аьдатравун дагьан най душиврия ххарину бия», – увкунни ва фестивальданий чялишну гьуртту хьусса Лакрал чичултрал секциялул каялувчи Супиян Оьма­ровлул.
ПатIимат Рамазанова