Ларгсса нюжмардий ДР-лул ХIукуматрал хъунама Аьбдулмуслим Аьбдулмуслимовлул 50 единица цIусса транспортрал буллунни 23 райондалул ва 5 шагьрулул кIулшиву дулаврил идарарттан.
Вайннува ца машина буллунни Бабаюртуллал кIанттайсса Сангардал школалун. Ванияр хьхьичIгу премьер-министрнал 171 санитар машина буллуссар цалчинсса медициналул кумаг буллалисса идарарттан. Вайннувагу Лакрал райондалул азарханалун бувкIссар кIива машина. Автотранспорт ларсун дур «Продолжительная и активная жизнь» миллатрал проектрал лагрулий.
Автотранспорт ласун итадаркьуну дур 190,5 млн къуруширттал. «Школарду ттизаманнул транспортрал дузал баврийну мюхчан хъанахъиссар оьрчIру школалийн лага-бучIаву. ЦIусса автотранспортрал кумаграйну хIакинтураща бюхъантIиссар, къашайшалтрачIан чIумуй бивну, анаварсса кумаг бан, кIантту-кIанттурдайва къашайшалтрал цIуллушиву ххал даван. Укунсса чараннал исват буллай бур республикалул ХIукумат зий душиву лябукку буну, социал агьамшиву дусса отраслирдах хаснура къулагъас дуллай», – увкунни Лакрал райондалул бакIчи Юсуп МахIаммадовлул.
