Март зурул 21-нний МахIачкъалаливсса «Европа» залдануву, Дагъусттаннал гуманитар институтрал ва Гуманитар-педагогикалул колледжрал сипталийну, паччахIлугърал органнал зузалт, жяматийсса ишккаккулт, СМИ-лул вакилтал, депутатътал гьурттусса ифтар хьунни.
Оьвкуну бия СВО-лий гьуртту хьуминнайнгу. Мероприятиялий гьуртту хьунни республикалул муфтий АхIмад-хIажи Аьбдуллаевгу. Ванал маслихIатчи Айна-ПатIимат ХIамзатовал кIицI лавгунни, билаят гьар чулуха кIибищун бан ччими, гъургъазарду дуван ччими бусса ппурттуву, Гуманитар институтрал, жагьилтуран куртIсса ва цIакьсса кIулшивуртту дулаврицIун, тIайласса тарбия дулавриву, тIайла бацIан бавриву агьамсса кIану бугьлагьишиву. Национал политикалул ва диндалул иширттал министр Энрик Муслимовлулгу чIурчIав дунни гьамин цIакьсса кIулшивуртту думи кьянкьану информациялул дяъвилий данди буккайшиврий, ссаву ци буссарив бувчIин буллалисса хIуччардугу гьанулун ласлай. «КIулшивуртту дулаврищал цану хъар ласласиссар тарбиялулмур даврилгу. Менделеевлул увкусса куццуй: «Тарбия дакъасса кIулшивуртту авлиянал, ахIмакьнал кIунттихьсса турди». Аьрасатнал президент Владимир Путиннул тIийкун, билаятрай исламрал кIулшивуртту дуллалисса система цIу дуккан дуллан аьркинссару», – увкунни ванал.
Ихтилатру буллалиминнал кIицI лавгунни, 2004-ку шинал зун байбивхьусса Гуманитар институт хIакьину региондалул ца яла хьхьичIунмур вуз бушиву. Институтрал выпускниктал хьхьичIунсса динчитал ва жяматийсса ишккаккулт бушиву. Вава бюхъу-хIарачатрай зий бушиву Гуманитар-педагогикалул колледжрал коллективгу.
БавтIцири барча буллалисса, республикалул агьалинал рувхIанийсса оьрмулуву Муфтиятрал бияла хъунмасса бушивриясса махъру лавхъунни Аграрный университетрал ректор Зайдин Жамбулатовлул, СВО-лул Аьрасатнал цалчинма Виричу НурмахIаммад ХIажимахIаммадовлул нину, 54-мур школалул директор Сапижат Мазаевал.
Ифтарданул ахирданий Гуманитар институтрал ректор НухIкьади БахIмудкьадиевлул кIицI лавгунни, ифтардал ва вава журалул мероприятиярттал рувхIанийсса цашиву цIакь дуллалишиву.
ПатIимат Рамазанова
