Ва ххуллухьсса «Илчилул» зузалтрал аьрххи Ккуллал райондалийнсса бия. Жу гьуртту хьуру Аьрасатнал Виричунал нину Сапижат Мазаевал ва отставкалийсса полковник Артур Амуттиновлул райондалул жяматращалсса хьунабакьаврий.Мероприятие дачин дурну ия Ккуллал райондалул хъунама Ажуб ХIусманов. Шикку гьуртту хьунни райондалул идарарттал каялувчитал, шяраваллал вакилтал.
КIулсса куццуй, хIакьинусса кьини райондалий щаллу бан багьлагьисса масъалартту гьарзасса бур. Ми так ца райондалул хъуниминнал кашилийну щаллу бан шайссагу бакъар, аьркинну бур чIарав бацIулт, кумаг бувулт. Мунияту жяматрал вайннайнсса хьул-умудругу хъунисса бия, Сапижат Исяевнагу, Артур Михайловичгу жяматрал иширттавух гьурттусса, миллатрайгу, райондалийгу дакI цIуцIисса хIакьсса патриотътал бушиву кIулну.
Райондалул хъунаманал бувсунни бусравсса хъамаллурая.
– ХIакьину жущала хьунабакьин бувкIсса жула райондалул вакилтал зун укунмагу кIулсса инсантал бур. Вай мудангу жула райондалул иширттавух хIалану буссар. Сапижат, райондалий бакъассагу, щалагу билаятрай кIулсса инсан бур. Ва каялувшиву дуллай бур цIуну тIивтIусса шагьрулул ца яла хъунмамур школалий. КутIасса чIумул мутталий ванища бювхъунни, ххаллилсса коллективгу лагма лаган бувну, школалул даву низамрайн рутан. Му бакъассагу, ва дачин дурну бур хъуннасса жяматийсса давугу, цуппа кунма дард ккарксса ниттихъал масъалартту щаллу бан ка-кумаг буллай, хьунабакьалай бур аьралитуращал. Цила мажал бакъашиврух къабурувгун, чIун ляркъунни ванил райондалийн бувкIун, жяматращал хьунабакьинсса. Цила захIматсса къювугу дурхIуну, цийхра дурксса кьини лайкьну лахъан хIарачат буллай бур Сапижат, – увкунни Ажуб ХIусмановлул.
Хъирив махъ лавхъунни Сапижат Мазаевалгу. Ванил кIицI лавгунни, райондалул жяматращал хьунабакьаврия ххарину бушиву, бувсунни цила оьрмулул ва захIматрал ххуллия.

 
– На дакIнийхтуну барчаллагьрай бикIара оьрчIал тарбиялул ялув кьянкьану бавцIусса ттула нитти-буттайн. Пишалул ххуллийсса насихIатчину хьуссар ттун ппу. Ванал маслихIатрайн бувнуя на учительнал пишагу язи бувгьусса. Зун бивкIун махъ бувчIунни нава тIайласса ххуллу бувгьушиву. Багьу-бизулул, мяърипатрал чулуха ттун эбратну хьуссар яхIирай оьрму бувтусса ттулла нину. ХIакьину сант дирирну дунура дакIнийхтунусса барчаллагь учин ччай бур Къяннал ва Ккуллал 2-мур школалул учительтурахь. Вайннал лахьхьин бувмур ттун оьрмулуву мудан бучIи ляхълай бур, – увкунни Сапижатлул.

 
Хъирив ихтилат бунни райондалул жяматран ххуйну кIулсса, тамансса шиннардий мюхчаншиврул органнаву зий ивкIсса, аьралий пенсионер, отставкалийсса полковник, СунбатIуллал шяравасса Михаиллул арс Артур Амуттиновлул.
Уссурвал Артур ва ­Амучи (аьпа биву) Амуттиновхъул лакран ххуйну кIулссар ихIсандалул давурттайну, чумартсса тIуллайну. Артур Амуттинов, СунбатIуллал школагу къуртал бувну, дуклан увххуну ур Ленинградрайсса Хьхьирил академиялувун. Мунияр махъ цаппара шиннардий зий ивкIун ур Хьхьирил портрай. Оьрмулул чIяруми шиннурив, (30-нния лирчусса) ванал ларгун дур мюхчаншиврул органнаву жаваблувсса къуллугъирттай зий. Миннува перестройкалул чIумалсса, яла захIматми арулла шинай, зий ивкIун ур Гъумук. Махъсса ххюра шинал лажиндарай каялувшиву дуллай ивкIун ур Республикалул Ростехнадзорданул управлениялий. Лайкь хьуну ур паччахIлугърал ва ведомствалул наградарттан. Миннувух дур Аьрасатнал ХIукуматрал председатель Михаил Мишусттиннул чулухассагу.
– ЦIана райондалул бакIчиналгу, жяматралгу кIицI лавгунни хьхьичI ххуттайн лавсъсса масъалартту. На тачIавгу вай масъаларттая арх увцун ивкIсса инсан акъара. Гьашину тIабиаьтрал биян бувсса зараллу сававну хъиннува ххишала хьунни щинал, ххуллурдал, ттукIрал, связьрал масъалатту.
ХIакьину Ккуллал райондалий каялувшиву дуллай ур зун гъирагу-шавкьгу дусса, жяматрай дакI цIуцIисса жагьилсса бакIчи. Амма ца каялувчинаща цувалу зий вай масъалартту дузрайн буккан бан къабюхъантIиссар. ХьхьичIми каялувчитурая ххуймургу лавсун, цаламур бюхъу-бажаргу ишла бувну, жяматгу чIарав бавцIуну, меценатъталгу лагма лаган бувну, ца команда дурну зурчан, жущара хьунтIиссар район цIу дуккан дан, ванил даража гьаз бан. Навагу хIадурссара ттула кашигу, кьудратгу райондалул жяматран мюнпатну ишла дуллай, ва командалуву зун. ЧIа тIий ура цIанасса каялувчинан тIайлабацIу, гьарица дуллалимур бартдигьинсса каши-кьудрат, – увкунни Артур Амуттиновлул.
Ва кьинисса хьунабакьаврий кьиматрай кьамул унни Вихьуллал школалул директор, «Доблесть гор» программалул цалчинсса выпускниктуравасса Оьма Чаринов. Шиккува бусан, ва программалуву гьуртту хьусса азаллийхъайсса инсантурава язи увгьусса 35-ннавасса ца ур жула Оьма Чариновгу.
Ванал бачаллагь увкунни Сапижат Мазаевахь чIярусса шиннардий буллай лахъи лавгсса Вихьуллал школа къуртал бан кабакьу бувну тIий.
– Аьрасатнал «Время Героев» тIисса программалул аналогну хьусса «Доблесть гор» тIисса республикалул программалуву гьуртту хъанахъисса чIумала кIул хьуссия ттун Сапижат Исяевна лавайсса даражалул каялувчигу, опыт бусса учительгу бушиву. Ванил мудангу мяъна-мурад дусса, бюххансса ихтилат байва. Пахру багьлай бия ва жула лаккудуш бушиврия, - увкунни ванал.
– ХIакьину жула райондалул жяматращал хьунабакьин бувкIсса Сапижат Мазаева ва Артур Амуттинов жяматран бусравсса, даража лавайсса инсантал бур. Хаснува кIицI лаган ччива Виричу тарбия увсса нину, Сапижат Мазаева. Хъамитайпа хIисаврайгу, нину хIисаврайгу ванин захIматсса кьинирду лахъан багьунни. Вай кьинирдугу цуппа кунмасса ниттихъалгу дакI данмур буллай, яхIирай лахълай бур ва.
Ванил оьрмулуву чанна­сса, ххарисса, тIааьнсса бакъа ишру къахьуннав уттиния тихунмай тIий, дуаьгу дурну Сапижатлул хъачIунттайн кIяла чалагъай руртунни ЧIяйннал школалул директор Альбина Гаммакуевал.
Хъамаллуран цIуллушиву, тIайлабацIу чIатIутIисса ихтилатру бунни аьралий иширттал ветеран Шамхал Хизриевлул, жяматийсса ишккакку МахIаммад Оьмаровлул, Ваччиял оьрчIал багърал хъунмур Асват Чупалаевал, Ваччиял школалул директор Бажи Мирзаевал.

Къучагътуран наградартту дуллунни

Хьунабакьаврия махъ райондалул администрациялул къатраву хьуна хасъсса аьралий операциялул гьурттучитуран наградартту дуллалисса батIаву.
ПаччахIлугърал наградартту дулун увкIун ия Лакрал ва Ккуллал районнал аьралий комиссар Аьли ГъазимахIаммадов. Хъусращиял шяравасса Рамазаннул арс Расул Будаевлун дуллунни «За отвагу» медаль.
Цуксса хIайпнугу, кIилчинмур награда – Чувшиврул орден, канил дугьан нясив къархьунни Хъусращиял шяравасса чувшиврий жан дуллусса Шагьмандаров МахIаммадлун. Ва дуллунни къучагънал нитти-буттахьхьун – Шихамирдухьхьун ва Маринахьхьун.
Ва кьини аьралитурал ниттихъал, кулпатирттал, ссурваврал дакI дансса, асар хьунсса махъру увкунни Сапижат Мазаевал.
– Щиннияргу хъинну ттун бувчIлай бур цукунчIавсса наградарттал жула къюву лагь къадантIишиву. Ци чулийгу яхI буллан, ссавур дуллан багьантIиссар. Жува мукIруну ва пахрулий бикIан аьркинссару жула арсурваврал Ватандалул мурадру, жула паракьатшиву дуручлай жанну дуллушиврий. Чув-бухьурчангу, дакIний битан аьркинссар жува лайкьсса арсурваврал ниттихъул бушиву, – увкунни Сапижатлул.

Андриана Аьбдуллаева