Августрал 12-нний ДР-лул ХIукуматрал председатель Аьбдулмуслим Аьбдулмуслимовлул каялувшиврулу хьусса батIаврий ххал бивгьунни Цасса паччахIлугърал экзамен дулаврил ва школарду цIусса дуккаврил шинайн хIадур баврил масъалартту.

Премьер-министрнал видеоконференциялул низамрай вичIи дирхьуна Дагъусттаннал кIулшиву дулаврил ва элмулул министр ЯхIия Бучаевлул, ДР-лул Роспотребнадзорданул управлениялул каялувчи Залимхан Оьмариевлул ва цаппара муниципалитетирттал бакIчитурал ихтилатирттах.
БатIаврий гьуртту хьуна Аьрасатнал Виричу Тамирлан АбутIалимов.
Шикку бакIрай ххал диргьуна ПаччахIлугърал экзаменну дулаврил хIасиллу. Аьбдулмуслимовлул тIимунийну, ГИА (государственная итоговая аттестация) сакин даврил лагрулий тамансса давуртту дурну диркIссар. Мукуннасса давуртту дуван тIий дур ялун нанимур дуккаврил шиналгу.
– Лавайсса баллу лавсъсса выпускниктал ялу-ялун гьарза хъанай бур. Гьашину 100 балл лавсми бия 49, 90 ва ххишаласса баллу лавсми – 700-ннаха ливчусса, – куна Аьбдулмуслим Аьбдулмуслимовлул. Да­гъусттаннал премьер-министрнал тIимунийну, гьашину Республикалул каялувчинал сипталийну 100 азарда къуруш премиялул ккаккан дурну дур 2 ва ххишаласса экзаменнай 95-нния 99 балл лавсминнан.
МуницIунма, премьер-министр­нал бусаврийну, циняв муниципалитетирттай бувчIлай бакъар ва масъалалул агьамшиву, муния буслай бур экзаменну дуллалиминнал давуртту дукьан дурну душиврул (аннулировать) ва административ жаваблувшиврийн кIункIу баврил. Ванал бувсуна мукунсса ишру бикIан къабучIишиву экзамендалул чулухунмай, райондалул бакIчитурайн тапшур бувна гъалатIирттал ялув даву дуван ва ЕГЭ-лул хIасиллал анализ дуван. Аьбдулмуслим Аьбдулмуслимовлул бусаврийну, гьашину 9 -11-ми классру къуртал буллалиминнал аьдад дур 59 азара.
ЦIусса дуккаврил шинайн хIадур шаврил хIакъираву премьер-министрнал тапшур бувна циняв школарду хIадур буван августрал 19-ннийнин.
Муниципалитетирттал бакI­читурайн тапшур бувна щаллу дуван террорданул ва цIу лачIаврил иширттаясса мюхчаншиву.
ГИА-лул хIасиллал хIакъираву махъ лавхъуна ЯхIия Бучаевлул. Ванал тIимунийну, Дагъусттаннай циняв экзаменну дуллуну дур цасса расписаниялий кка­ккан дурсса чIумал. Министрнал бувсуна Дагъусттаннал школардай ишла буллан тIий бушиву Москавуллал электрон школалул кунмасса электрон дневникру. Программа зий дур республикалул циняв школардай.
Школарду цIусса дуккаврил шинайн хIадур шаврил хIакъираву ЯхIия Бучаевлул бувсуна цIанасса ппурттуву Да­гъусттаннай дуккаврил шинайн хIадурну бушиву сайки 75 % объектирдал.
ХIакьинусса кьини цIусса дуккаврил шинайн 880 оьрчIал багъирдаву хIадурну бур 625, 1404 школардава – 1002, 69 колледжрава – 55.
2024 шинал капремонт дурну дур 10 школалий, мукунма хIадур буллай бур тIитIин 21 школа, 1 оьрчIал багъ.
Залимхан Оьмариевлул бувсуна школардай ва оьрчIал садикирттай дукиялул иширттах цукунсса ялув бацIаву, къулагъас дуллай буссарив. Ванал ихтилат бия дукиялул продукты дучIан дайминнащал цукун зий буссарив. Ванал бувсуна вайннал давурттавусса диялдакъашивурттаягу.
МахIачкъалаллал бакIчи Юсуп Умавовлул бувсуна сентябрьданул 1-нний тIитIлай бушиву 250 кIану бусса блок-пристройка – 22-мур лицейрачIа, 500 кIану бусса блок-пристройка – 39-мур лицейрачIа, блок-пристройка – 27-мур школалучIа, 129 кIану бусса ца оьрчIал багъ.
Каспийскаллал бакIчи Борис Гонцовлул бусаврийну, дуллай бур школарду гъили баврил системалул ремонт. Бакьин буллай бур Кизилюртовская кучалий­сса школа. Ванал гьартану бувсуна цукунсса давуртту дуллай буссарив школардай.
Республикалул школарду цIусса шинайн хIадур баврил хIакъираву бувсун цаппара муниципалитетирттал каялувчитуралгу.
БатIаврил ахирданий премьер-министрнал КIулшиву дулаврил ва элмулул министерствалийн ва вице-премьер Муслим Телякавовлийн тапшур бувна гьарца кьини ххал дигьлан школарду сентябрьданул 1-ннийнин хIадур баврил давуртту.

ХI. Аьдиловл