Ва аьрапалул зуруй ччай бура ттулва ххирасса, дакIния къабуккайсса нину ва ппу «Илчи» кказитрайхчил дакIнин бичин. Ппу Аьлилов Рамазан Бярнихиял шяраву увну ия, нину Аьлилова ПатIимат – Тукъатуллал шяраву. 1944-кусса шинал, чIярусса цайми щархъал агьулданущал, вайннангу бизан багьну бия Чачаннал аьрщарайн, ЦIуссалакрал райондалийсса Чапаево шяравун.
Бизан бувсса чIумал ппу 14 шинавун ивсса чIаважагьил ивкIун ия, ниттин тIурча, 8 шин диркIун дия. Тамансса захIматшивурттугу ккарккун дия ххуллийх нанисса чIумалгу, бивзун махъ кIанттул хъанахъисса чIумалгу.
Нитти-буттал жу бияв арулва оьрчI: ряхва душгу, ца арсгу. ДакIний бур, 1967-ку шинал август зуруй жул уссу Аьлил увну, буттал ххаришиврул ЦIуссалакрал ва Чапаевкаллал агьулданун уздансса ччатI бивхьуна, сайки хъатIи бувна. Амма уссу увну шанна шин хьуну-къархьуну, кIул бакъасса бивкIулул ппу жуяту личIи увна. ЧитIулт кунма, чIев-чIев тIий, тяхъану яхъанахъисса жу хьунав ятинтал. Хъунмур ссин 13 шин дия, чIинма-чIивимунин 3 барз бия. Буттан цаннагу 39 шин дия. Жу мюрщиния шинмай «мама-папа» тIий аьдат бувну бияв. Муния шихуннай «папа» тIисса цIа, жула дакIурдил куртIниву кIучI дурну, му кIицI къадувай хьунав жу, хъуннасса кьурчIишиврущалсса цIа хьуна жун му. ЩилкIуй му кIицI дуварчангу, жун яс шайва, жула дакIурдиву иминну ядуллай бикIайссияв му цIа.
Ппу, цалчин, хъинну ккаккан ххуйсса ия, кIилчин тIурчан, тIуллу дюрхъусса ия, щин ци аьркинссарив кIулсса ия, инсантал ххирасса ия. ЧIумух бурувгун кашигу ларайсса ия, маэшат хьун бан кIулсса, ххуйсса пикри-зикрирду бусса, ми иширайну бартбигьингу кIулсса ия.
Хъинну дуккаврихунгу агьсса ия ппу: дакIний ур, чIюй луттирдалгу чIарав бивхьуну, лахьлай, чичлай икIайва. Ччянива къуртал бувну бия университетрал тарихрал факультет, хъирив къуртал бувну бия Краснодардал культуралул институт, Ростоврай бувккуну бия Партиялул лахъсса школа. Махъсса шиннардий аспирантуралуву дуклай, апрель зуруй защита дуну, мартрал 26-нний му кьадар ялун бивуна, ци бакIрачIан бувкIссаривгу хIакьинугу къакIулли.
Махъ, нава университетраву дуклакисса чIумал, на, научный отделданувун лавгун, цIуххаву дурссия: элмийсса каялувчину ивкIун ия Тананакин тIисса инсан, давугу «Дагъусттаннал культуралул тарих» тIисса диркIун дия. Буттал цала чивчусса хъун бакъасса лугу буссар «Все во имя человека» тIисса.
Зий айивхьуну ия ппу 14 шинаву къурнил учетчикну, 1944-ку шинал чIявуми инсантал дяъвилий буну, зунсса аьркинну бивкIун бия. Муния махъ зий ивкIун ия трактористну, яла – райкомрал инструкторну, яла – отделданул каялувчину. Муния мукьах ппу мадарасса хIаллай зий ивкIун ия райпорал председательну.
Цува зузиссаксса хIаллай буттал мукун гьаз дуруна райпорал даву, ттун къакIулли та чIумал мукунсса давуртту дан шайсса диркIссарагу. Япониянащал кьутIи дурну, тиха хъус тIайланна райпорайн дукIлакIи дурну, ших халкьуннащал хъюруврах ва гьивхьхьух даххана дуллай, ми Японнавун тIайла дуклай, халкь хъинну рязину личIансса давуртту дуруна. Гьивхьгу, хъюрувгу чIярусса дикIайва инсантурачIа. ХIасил, Чапаевкаллал жямат япон яннардаву занази бувссия буттал та чIумал. Мукун гьарица ишираву гьунар бусса ия ппу. Москавлия кино дишайсса аппарат лавсун увкIун, къатлуву цIангу дурну, чIирай кино чIалачIи дуллай, щала махIлалул оьрчIру-душру бялахъан буллан икIайва ппу.
Та дия телевизорду, холодильникру бакъасса чIун.
Ца ппурттуву Москавлия ца негр увцуну увкIуна, мигу жува кунмасса халкь бушиву ккаккан бан, бусан. Щарнил жямат батIин бувну, мунащал клубраву хьунабакьин бувна.
Буттал хIурмат хъинну лавайсса бушиву чIалан бикIайва халкьуннал дянив, миннал жухвасса бургаврийн бувну.
Аьпа биву, Ярагъинал бувсуна, цувагу, Сяъдуттингу, ялагу Майкопрай дуклакисса шама-мукьа оьрчI, каникуллу къуртал хьуну, тихунмай най, райцентрданий автобусрах ялугьлай бавцIуну буссияв» куну. «Ца ппурттуву, вил ппу гъан хьуну: «Чун най буру оьрчIрув?» – куну цIувххуну бур. Бувсъссия Майкопрайн най буру куну. Нани ттущал куну, бувцуну райпорал складравун, сайки бакIрая ччаннайн дияннинсса янна лаххан бувну. На буттацIа хьусса оьрчI ияв, гамагу ятин ия».
ЧIиви-хъунсса ишираягума байран дуван кIулсса икIайва жул ппу. ДакIний бур, ца шинал, ЦIусса шинайн елка къабиривну, гьивхьхьул мурхьирал къяртта рирттуну, мунийх бинт кай-кай бувну, кIяла дурну, яла игрушкарттугу ларххун, жун байран дуруна. Гьарица байрандалийнгу батIайва цалагу, ниттилгу гъанчув, дустал.
Жул нинугу дия виричусса. Арулва оьрчI, щинчIав кIу бизан къабивтун, хъуни бувнав ниттил. Хъинну аькьлулул дурччусса, кIусса, дакI хъинсса дия нину. Щала хIарачат бикIайва ниттил жу дуккин бувансса, дарсру лахьлахьи бувну, жул ялтту дуклан дикIайва. Нину цурдагу дуккин дурну дия буттал: Ессентукилий Библиотечный техникум къуртал бувну бия, буттащал архIал занай. ЦIуссалакрал райондалийсса Библиотечный системалул директорну зий оьрму лавгссия мунил. ЧIяруну райондалий депутатнугу, райкомрал бюрорал членнугу дикIайва нину. КIира шин шавай дур ниттил жущал дакъа. ТачIав дакIния къадукканссар ниттил иминсса симангу, мунил жухава бувсса хъунмасса захIматгу.
РухIру алжаннаву дишиннав ниттил ва буттал, вай дакIнийну личIаннав жугу. Амин!
Майя Хайдакьова
