Дагъусттаннал Росгвардиялул управлениялий хьунни Нацгвардиялул аьралуннал къуллугъ сакин бувну 9 шин шаврин ва Ихтиярду ва низам дуруччайсса аьрал сакин хьуну 214 шин шаврин хас бувсса шадлугърал мажлис. Мероприятие дайдишин хьхьичI тIутIив дирхьунни къуллугърал бурж биттур буллай жанну дуллусса аьралитурал гьайкалдануцI, баян бунни минутIрайсса пахъ багьаву.
Мажлисрай гьуртту хьунни Росгвардиялул региондалул управлениялул хъунаманан кIанайсса полковник Вадим Кьурбанов, хъунаманал хъиривчутал, подразделениярттал командиртал ва ведомствалул зузалт.
Цала ихтилатраву Вадим Кьурбановлул кIицI лавгунни, Дагъусттаннал Росгвардиялул управлениялул подразделениярттал, ведомствалул гьану бивзния шихунмай закон ва агьалинал ихтиярду дуручлай, лавайсса даражалий бартбигьлай бушиву цала къуллугърал бурж.
– Жула подразделениярттал, гьарица кьини оьрмулун нигьачIаву дусса шартIирдай зий, хъунмасса захIмат буллай буссар терроризмалущал ва экстремизмалущал, сакиншиннарайсса тахсиркаршивурттащал талатаврил ххуллий, дуручлай буссар жяматийсса низам, хъуннасса агьамшиву дусса объектру. ХIакьину жула зузалт ва аьралитал, хасъсса аьралий операциялий Ватандалул мурадру буручлай, ххувшаву гъан дуллай буссар. Хъунмасса барчаллагь тIий ура цинявппагу зузалтрахь, МахIачкъалаллал соединениялул аьралитурахь цала къуллугърал буржру лайкьну бартбигьлай тIий, – увкунни Вадим Кьурбановлул.
Ванал мукунма лавайсса кьимат бивщунни къуллугърал ветерантурал даврин. Барчаллагь увкунни аьралитурал гъан-маччаминнахь.
Мажлисрал лагрулий къуллугърал бурж лайкьну бартбигьлагьисса зузалтран дуллунни ведомствалул чулухасса наградартту ва бахшишру.
Мероприятие къуртал хьунни Дагъусттаннал эстрадалул артистътурал, искусствардал школардал оьрчIал хIадур дурсса концертрал программалийну.
Андриана Аьбдуллаева
