Ккуллал райондалийсса оьрчIан ссуттил хьхьуттайх лахъан лахьхьин буллантIиссар.

Ва даву дуван дакIнийсса, цIа ларгсса пагьламан Камил Маммаевлул балжину бувсунни проектрая: «ДукIу Каспийскаллал хьхьирил пляжрай мастер-классру ккаккан буллай, 100 инсаннан хьхьуттайх лахъан лахьхьин бувссия. Ккуллал район – пагьламаншиврул гьану бивзсса районни. ЧIявуми дуклаки оьрчIан хаварвагу къабикIай муния. Ттун пикри хьуна, райондалул школардайх уклай, пагьламан лахъан лахьхьин гъира бусса оьрчIру ххал бувну, миннащал зун. ЦIухху-бусу бувну, бувчIунни гъира бусса оьрчIру тамансса бушиву. На проект Дагъусттаннал бакIчинал грантирдал конкурсрайн гьан дурссия, заявка кьамул дурна, хьхьичIунми проектру дурчIлачIисса цалчинсса этапрайгу тIайлабацIу хьуна. Утти щилчIав бияла бакъасса экспертизалух ялугьлай ура, миккугу тIайлабацIу хьуншиврий дакI дарцIуну ура.

Проектрал мурад буссар, профессионал оборудованиялущал Ккуллал райондалул 10 школалийн ивну, хьхьуттайх лахъан лахьхьин буваврицIун, оьрчIахь пагьламаншиврул тарихрая, цIанихсса пагьламантурая буслан. ЦIувкIуллал пагьламантуран лахъсса кьимат бивщуну бур совет заманнай, щала дунияллийх ЦIувкIуллал пагьламантурал цIарду машгьурну диркIссар. Ми къабивсса билаят бакъахьунссар. Вагу жула миллатрал тарихри. Пагьламаншиврул школа мобильнайссар, билаятрал цайми регионнайн, зунттал районнайн, оьвтIинийн занан багьлай бухьувкун, архIал ласун къулайсса оборудование дуссар. ЗунтIиссару.
Ноябрьданул 4-нний, Халкьуннал цашиврул кьини, ттула учениктуращал на уккантIиссара Ваччавсса байрандалийн бавтIцириннал хьхьичIун. ОьрчIащал архIал хьхьуттай гьунарду ккаккан буван. Даврил хIасиллугу му чIумал чIалантIиссар. Ва ялагу, Халкьуннал цашиврул кьини жува хьхьуттайх лахъултрал магьирлугъ цурда лярхъусса миналийн зана дитаву хьунтIиссар. Му магьирлугърахун агьан ччисса, сивсусса, савсъсса ва яла-яларив, гъира бусса ухьурча, хIарачат банни бусса. ЛахьхьинтIиссар пагьламан лахъан», – увкунни Камиллул.

ПатIимат Рамазанова