Вай гьантрай МахIачкъалалив, Поэзиялул театрдануву, «Дагестан» РГВК-рал хIадур дурсса документал журалул «Батюшка» киносурат ккаккан дунни. Ва гьашину июнь зурул 23-нний террористътурал оьрмулуцIа увсса, Дарбантуллал килисалул настоятель Николай Котельниковлуясса дур.

Ва МахIачкъалалив ва Дарбантлив килисалуву зий ивкIссар чIярусса шиннардий. Ччянива ххачпараснал агьулданунгу, цинявннангу бусрав хьу­сса, хIалимсса инсан уссия. Ва оьрмулуцIа уваву щалвагу билаятрал агьалинан кьувтIуссар.

Кино ххал дуван бавтI­ми­ннавух бия Республикалул ХIукуматрал хъунама Аьбдулмуслим Аьбдулмуслимов, Да­гъусттаннал парламентрал цалчинма вице-спикер Юрий Левицкий, Печатьрал ва информациялул агентствалул хъунама Аьбдуразакь Жамалуттинов ва цаймигу бусравсса хъамал.
Фильм ххал дурну мукьах, кашишнал душнил барчаллагь кунни автор Лиана Парчуевахь, ппу цукунсса инсан ивкIссарив магьирну ккаккан буваврихлу.
«Дюххансса дур киносурат. Ппу ва киносуратраву цукунсса урив, оьрмулувугу мукунасса ­уссия», – увкунни ванил.
Бусанна Лиана Парчуева 1-мур ЦIувкIратусса тележурналист бушиву ва журналистикалувунсса ххуллу ванил цила чIумал «Илчи» кказитрай дурксса макьалардаягу байбивхьушиву.

Лианал барчаллагь увкунни Николай Котельниковлул мачча-гъаннахь, кашишнал оьр­мулул ххуллия, цалва асардая бувсун, гьурттушинна дуваврихлу.
«Бигьану бакъая ва кинораха зун, дунияллия лавгсса инсанная духьукун. МуницIухва, жун бувчIлайгу, асар хъанайгу бия, ва дакI-аьмал хъинсса, инсантуран мяърипатрал ххуллу ккаккан буллалисса динчинал аьпа уттава буллали­сса давриву жулвамур бутIагу бунутIий. Ва ттуллалусса даву дакъар, операторнал, монтаж дувайминнал, даврил уртакьтурал бутIагу буссар, вайннайнгу барчаллагьрай бура. Ва киносуратгу ккаккан маслихIат буллай бура жулва хъирив наниминнангу, жучIара кьиматрай­сса рувхIанийсса ххуйшивурттал кьадру бикIаншиврул», – увкунни Лианал.

ПатIимат Рамазанова