Ккуллал райондалий Ваччиял шяраву хьунни Хъаннил байрандалун хас бувсса мажлис. Райондалул бакIчи Шамил Рамазановлул райондалул Хъаннил советрал председатель Загьидат ХIамзаева, ниттихъул, ссурвал барча буллалисса ихтилатрайну байбивхьунни мажлис.

Шиккун оьвкуну бия Украиннал аьрщарай нанисса хасъсса аьралий операциялий къуллугърал бурж бартбигьлагьисса аьралийтурал ниттихъайн, ­кулпатирттайн, ссурваврайн.
– Ххирасса ниттихъул, ссурвал! Барча буллай ура зу ­Хъаннил байрандалущал. ­Ниттихъал кьини кIицI лагаврил мурадгу хъанахъиссар хъанниха хIурмат баву, кулпатру буруччаву ва оьрмулуву ниттихъал агьамшиву чIалачIи даву.

Ва хIакьинусса хьунабакьаврийн зу зула гьармуданмасса къайгъурдая чансса-бунугу ­бигьалаганссару, ххари банссару тIисса умудрай ура. Цинявппагу шиккун бувкIсса ниттихъул мяйжаннугу лайкьну оьрмурду бивчусса, бусравсса, ххаллилсса инсантал бур. Къатта-къушгу бачин бувну, хIукуматрал давурттайгу зий, оьрчIругу чча­ннай бацIан буллай зу бивхьусса захIматран багьа бакъассар. Зу кунмасса ас-ламус бусса, уздансса, аькьилсса ниттихъалли хIасул бувсса цIакьсса, нахIу-хIалимсса кулпатру.
ЧIа тIий ура зун цIуллушиву, талихI, тирхханну, дунияллий дакьаву, – увкунни Шамил ­Рамазановлул.

Аьралийтурал ниттихъул ххари баву мурадрай, вайннан хас дурсса концерт ккаккан дунни Магьирлугърал къатрал ­зузалтрал.
Ва кьини цачIанма оьвку­сса ниттихъан тIутIал кацIру ва дакIний личIансса бахшишру дуллунни Шамил Рамазановлул.
Ниттихъан хас бувсса шеърирду бувккунни ва балайрду увкунни Хъусращиял ва ­Вихьуллал искусствардал школардал тарбиялувтурал.

Имара Саидова