Сентябрьданул 16-нний Москавлив Дагъусттаннал Постпредствалул сипталийну «Русская песня» тIисса паччахIлугърал академический театрдануву лахъа-хъунсса даражалий хьунни Дагъусттаннал Халкьуннал цашиврул кьинилун хас дурсса байран.

Театрданул фойелуву концерт дайдишиннин бавтIцириннал тамаша бувна республикалул культуралун ва эбадатирттан хас дурсса выставкалий.
Концерт дайдирхьуна оркестрданул Мурад Къажлаевлул «ЦIунилгу зунттавун» тIисса произведениялия. Хъирив Дагъусттаннал бакIчинал кIанттайсса Фёдор Щукиннул барча бувна бавтIцири. Агьали барча бувна постпреднал кIанттайсса Руслан Нагиевлулгу. Ванал кIицI лавгуна, чIявусса миллатру бусса Дагъусттанная архну дуллай бухьурчангу байран, республикалул тарихрал, культуралул ва аьдатирттал хIурмат лахъну бушиву ккаккан буллалисса байран душиву, аьмсса культуралия, тарихрая ва эбадатирттая гъалгъа тIисса чIумал, архсса манзиллугу гъан буллалишиву.

Шадлугърай ихтилатру буллалиминнал кIицI лавгуна, бигьа бакъасса чIуннардий ягинну ялун личайшиву Дагъусттаннал халкьуннал яла ххуйми лишанну: Ватандалухсса ччаву, ццах бакъашиву, цIакьшиву, душманнайн кьянкьану данди бацIаву.
Концертрай балайрду увкуна халкьуннал артистътурал: Рашид Багатаевлул, Кристина Рамазановал, Рукьият ХIамзатовал, Ринат Каримовлул ва цайминнал.

ЧIарадиял чиваркIуннал «Поющая Чарода» тIисса хорданул «Дагъусттан» тIисса балайлул премьералийну ххари бувна бавтIцири. ЦIанихсса пагьламантурал наслулиясса цIувкIрачу Расул Абакаровлул хьхьуттай гьунарду ккаккан бувна «Кавказ» ансамбльданущал гьурттуну.
Концерт къуртал хьуна ЧIарадиял хорданущал архIал «Единый Дагестан» тIисса балай цинявннал учаврийну.
Ва концертрал сакиншинначитурал бувсуна 1000 инсан ивкIшиву залдануву.

«Билаятрал хъун шагьрулийсса байрандалийн бавтIун бия агьали, жула республикалул яла хъунмур хъус-ххазина – чIявусса миллатру бавкьуну, нахIуну, куннал хIурмат куннал буну къуццу тIий бушиву ккаккан буван. Жула ппухълугу укунма къуццу тIий бивкIссар, жувагу вава ххуллийх наниссару, наслугу вава ххуллийх бачавур аьмсса мурад. Байрандалий цайми регионнаясса хъамалгу бия, вайгу жула республикалул авадансса культуралул, миллатирттал къавтIавурттал, балайрдал, миллатирттал колоритрал хIайран бувну бия», – увкунни «Дагъусттан» МЦК-лул вице-президент, медициналул элмурдал доктор Астемир Шайхаьлиевлул.

Центрданул президент Арсен ХIусайновлулгу чIурчIав дурна Дагъусттаннал Халкьуннал цашиврул байран хьхьичIра-хьхьичI 2011 шинал дуршиврий Гъумук, Хан-Муртязалинсса гьайкал тIитIлатIисса шадлугърайн щала республикалиясса ва чIаххуврайсса регионнаясса хъамалгу бавтIун. КIицI лавгуна билаятрал хъун шагьрулийгу халкьуннал дянивсса дусшиву цIакь дуллалисса давуртту мудангу дуллай бушиву ва жува щала билаят дусшиврий бавцIунугу, дусшиврул бувгьунугу бушиву.