МахIачкъалалив «Россия-моя история» тIисса тарихийсса паркраву хьунни Аьра­сатнал Кьиблалул бугьараминнал форум «Наслулул аькьи­лшиву Аьрасатнал цашиврувур» тIисса цIанилу.

Ваний гьуртту хьунни Дагъусттаннал бакIчи Федор Щукин, ХIукуматрал хъунама МахIаммад Рамазанов, парламентрал хъунаманал хъиривчу Камил Давдиев, кIулшивуртту дулаврил ва элмулул министр ( врио) ЯхIия Бучаев, Дагъусттаннал бакIчинал Бугьараминнал советрал председатель Ибрагьим Ибрагьимов, ванал хъиривчу, профессор Мустапа Билалов, вава Советрал член Давидбаг Черкесов, политолог Шапи Ахъушали ва цаймигу идарарттал каялувчитал, жяматийсса ккураннал вакилтал.
Федор Щукиннул кIицI лавгунни, форумрал девизраву бушиву Ккавкказнаву аьсрурдая аьсрурдайн ирсирай нанисса кьиматрайсса ххазинарду: оьр­му кIулсса хъуначунал мукъул хIурмат лахъсса бушиву, жагьилтал къаххуймуния махъаллил бансса, рувхIанийсса ххуйшивурттачIан кIункIу-хъит бувансса давуртту.

ЛичIинува ххал бивгьунни Бугьараминнал советру властьрал органнащал ва жяматийсса институтирттащал уртакьну зун аьркиншиврул масъалартту.
Чачаннавасса, АьсатIи­нна­васса хъамалгу гьуртту хьусса дискуссиярттай гьаз бунни жагьилтал тарбия баврил агьамсса масъалартту ва Аьрасатнал цашиву миннангу хьхьичIунну душаврил ххуллийсса чаранну.
Аьрасатнал искусствардал лайкь хьусса ишккакку Наида АьбдулхIамидовал кIицI дунни мяърипатрал ва патриотизмалул гьанурдайсса тарбия цIакьсса душиву, Бугьараминнал советрал вакил Шалласу Шалласуевлул чIурчIав дунни тIайласса тарбия кIулшивурттацIун, захIматрацIун ва хъуниминнал хIурмат бушивруцIун дархIуну душиврий, къулагъас дуванми кIанттугу ми бушиву.
Ва батIаврил хIасиллу хIисав­рай кьамул дунни жагьилтал патриот зумуну тарбия баву мурадрайсса цачIусса проектирдал резолюция.
Форум хIадур дурну дия республикалул Миллатрал политикалул ва диннал иширттал министерствалул. Ванил лагрулийсса хьунабакьавуртту хьунни Дагъусттаннал Гуманитар институтрал ва М. Жамбулатовлул цIанийсса Дагъусттаннал Аграрный университетрал вузирдавугу.
ПатIимат Рамазанова