Лакрал райондалийн даврил аьрххилий бувкIун бия Дагъусттаннал Хъаннил союзрал хъунмур Хасайбат Валиева. Ванил хъаннил активращалсса хьунабакьаву хьунни администрациялул актовый залдануву.

Хьунабакьаврийн оьвкуну бия хасъсса аьралий операциялий гьуртту хъанахъиминнал ниттихъайн ва кулпатирттайнгу.
Райондалул бакIчинал хъиривмур Эльмира МахIаммадовал кIицI лавгунни агьамсса социал масъалартту чулийн буккан бавриву Дагъусттаннал Хъаннил союзрал хъунмасса кIану бугьлай бушиву. Му организациялул даврицIун кабакьу буллай бушиву райондалул каялувчитурал.

Райондалул бакIчи Зураб Куччаевлул цIания Эльмира МахIаммадовал барчаллагь увкунни Хъаннил союзрал вакилтурахь агьалинах дуллали­сса къулагъасрахлу. КIицI лавгунни хIадурну бушиву кабакьу буллан социал саргъуншиву цIакь даврил ва оьрму хьхьичIунмай баврил ххуллийсса гьарцагу сиптардацIун.

Хасайбат Валиевал бувсу­нни Хъаннил союзрал даврил агьамми ххуллурдая, СВО-лий ватандалул ххуллий жанну дуллуминнал ва хIакьинугу тийх ватандалул мурадру буручлачиминнал кулпатирттах аякьалий бушиврия.
ЛичIинува барчаллагь увку­нни райондалул Хъаннил советрал хъунмур Зувайрижат Мудуевахь, ванил ацIнияхъайсса шиннардий бувсса захIматрахлу. ЦIусса хъунмурну бувчIунни Загьидат Майранова. Ванин тIайлабацIу чIа тIий, Хасайбат Валиевал умуд бивхьунни гихунмайгу уртакьну зунсса.

Ахирданий Аьрасатнал Хъаннил союзрал чулухасса ХIурматрал грамотартту ва Дагъусттаннал Хъаннил союзрал чулухасса «Матери защитника Отечества» тIисса медаллу дуллунни СВО-лул гьурттучитурал ниттихъан.
Райондалул магьирлугърал къатлул зузалтрал ккаккан дурунни хъун дакъасса концертрал программа.