МахIачкъалалив, ­ ­«Аьрасат – ттул тарихри» парк­рал конференц-залдануву хьунни «Наследие, объединяющее народы» цIанилусса региондалул форум. Ванил сакиншинначитал бия Аьрасатнал халкьуннал Ассамблеялул региондалул отделение ва Дагъусттаннал Миллатрал политикалул ва диннал иширттал министерство.

Шикку гьуртту хьунни жяматийсса ва политикалул ишккаккулт, элмийсса ккурандалул ва жагьилтурал организациярттал вакилтал. Форум тIитIлай гьурттучитал барча бунни Дагъусттаннал миллатрал политикалул ва диннал иширттал министр Тамерлан АбутIалимовлул. Цала ихтилатраву ванал кIицI лавгунни чIявусса миллатру бусса жула республикалий укунсса, цинявппа лагма лаган буллалисса, Дагъусттаннал культуралул ирс ялун нанисса никирттан ябаву мурадрайсса форумрал агьамшиву. Мукунма ванал кIицI лавгунни жагьилтал ватан ххирану тарбия баврил масъалалух ххишаласса къулагъас дан аьркиншиву, жула оьрчIру яхI-къирият, мяърипат дуну тарбия бавриву хъуннасса хъар кулпатрал лахъайшиву.

Тамерлан АбутIалимовлул барчаллагь увкунни Аьрасатнал Халкьуннал ассамблеялул региондалул отделениялул председатель Зикрулла Илиясовлухь жула аслийсса аьдатру дуруччаврил ва жагьилтал ватан ххирану тарбия баврил ххуллий дуллалисса хъуннасса даврихлу. Ихтилатру бунни Зикрулла Илиясовлул, Дагъусттаннал жяматийсса палаталул председатель Амирхан МахIаммаддадаевлул, ­Аьрасатнал философиялул обществалул председатель Мустапа Билаловлул, Педуниверситетрал дагъусттаннал филологиялул факультетрал декан Зайнав Оьмаровал, Дагъусттаннал бакIчиначIасса Хъунилсриннал советрал председатель Ибрагьим Ибрагьимовлул. Бюххансса, асар хьунсса, жагьилтурахь мюнпатсса насихIатру буллалисса ихтилат бунни академик ХIамид Буччаевлул. Ихтилатчитурал гьаз бувсса масъалартту чIявусса бия, миллатирттал дянивсса цашиву цIакь давриву граждан обществалул институтирттал биялдарая региондалул социал-экономикалул даража гьаз баврийн бияннинсса. Цала ихтилатраву Зикрулла Илиясовлул бувсунни Ассамблеялул тарихрая, кIицI лавгунни форум Аьрасатнал цашиврул шиналсса ца агьамсса мероприятияну хъанахъишиву.

– Ассамблеялухь хъунмасса бияла буссар республикалул миллатру цачIун бан, миллатирттал мазру, Дагъусттанал халкьуннал аслийсса культура ва аьдатру ядан, – чIурчIав дунни ванал.
ДакIнин бутан, «Ассамблея народов России» тIисса жяматийсса организация сакин дурссар 1996-ку шинал, билаятрал миллатрал политика дачин дансса агьамсса механизм хIисаврай.1920-ку шинал муния дурссар паччахIлугърал ва жяматийсса организация. Ванил председательгу хъанахъиссар 2018-2020-ку шиннардий Дагъусттаннал бакIчину ивкIсса Владимир Васильев. Генеральный директор – Аьрасатнал жяматийсса ишккакку Артур Латыпов. Региондалулмур отделениялий каялувшиву дуллай уссар чIярусса шиннардий Ухссавнил Ккавкказуллал региондалий миллатирттал арардал масъаларттаха зузисса Зикрулла Илиясов. Ва ххуллийсса ккаккиярттахлу ва лайкь хьуссар «Гордость нации – 2023» Аьрасатнал премиялун, Ассамблеялул мусил медальданун ва Дагъусттаннал ва Ингушетиянал хIукуматирттал чулухасса грамотарттан.

Форумрал лагрулий «Миллатру чIявуссар – билаят цар»(«Народов много – страна одна») тIисса ца-кIива зурул хьхьичI баян бувну бивкIсса, халкьуннал дусшиврун хас дурсса региондалул конкурсрай ххув хьуминнан ва призертуран дуллунни наградартту: дипломру, кубокру. Бахшиш бунни Зикрулла Илиясовлул итабавкьусса «Золотые звезды СКФО на СВО» луттирду. Цалчинсса кIанттурду бувгьуминнавух бия ЦIуссалакрал райондалул Гьамиящиял школалул учитель Жамиля ХIусайнова цила хIадур бувсса оьрчIащал, Чараваллал школалул дуклаки душ Хава Нахмурзаева.