Октябрьданул 18-нний Дагъустта­­ннал Шяраваллил хозяйствалул ва бакI­лахърулул министрнал цалчинма хъиривчу Шарип Шарипов гьуртту хьнни Тарумовскаллал райондалун 80 шин шаврил шадлугъирттай.

Шяраваллил хъунмур майданнив хьунни байрандалун хасъсса мероприятияртту. Миннуй гьуртту хьунни райондалул бакIчи Василий Жамалов ва Дагъусттаннал ва Къалмукьнал властирдал органнал вакилтал. Шарип Шариповлул ДР-лул Шяраваллил хозяйствалул ва бакIлахърулул министерствалул цIанияту Тарумовска­ллал райондалул ялапарлувтурахь барча дунни юбилей ва наградартту дуллунни шяраваллил хозяйствалуву хьхьичIунну зузиминнан.

Шадлугърай махъ лахълай, Шариповлул бувсунни райондалий ялапар хъанай бушиву чIявусса миллатирттал инсантал куннащал кув хIал бавкьуну, хIурматрай, цала чIиримур ватандалухсса жаваблувшивугу дакIнийну.
– Тарумовскаллал район дур захIматкашнал аьрщи, авадансса хъузалтрал традицияртту дусса. Райондалий захIмат буллай бивкIссар шяраваллил хозяйство лядуккан дурсса, жагьилсса никиран давуртту дюхъан дуван лахьхьин буллай бивкIсса инсантал. ХIакьинугу хъузалтрал лайкьну дуллай бур мира давур­тту, райондалул ва щала Дагъусттаннал лябуккулуву цаламур захIматгу бихьлай, – увкунни министрнал хъиривчунал.

Байрандалул мероприятиярттал лагрулий хьунни шяраваллил хозяйствалул ярмарка, муний дахлай бия дикIул дукия, ахънилсса, ахъулсса, ницI, туртул нагь, чавахъ. Дузал бувну бия мукунма шяраваллал майданну.
Шадлугърал концертрай балайрду тIий бия артистътал ва творчествалул коллективрду, ­жагьилтурал дянив най бия футболданул, волейболданул, дучри ххяххан баврил ва цаймигу журардал бяст-ччаллу.