Дагъусттаннал Халкьуннал Мажлисрал ирглийсса 43-мур сессиялий «Единая Россия» фракциялул депутат Узлипат ХIасановал миллатирттал мазурдил хIакъиравусса доклад бунни.
Ванил кIицI лавгунни, шагьрурдайсса дуклаки оьрчIан бувагу ниттил мазру кIулну бакъашиву, 20-25 шиннава вайннал оьрчIаягу ниттил мазурдия бувагу хавар бакъасса ник хьунтIишиву, тагьар мяйжаннугу нигь дутлатисса душиву.
Ванил маслихIат бунни республикалий дуван агьали ниттил мазурдил словарьдал ва луттирдал щаллу буллалисса мероприятияртту, хъуннасса къулагъас дуван Ниттил мазрал кьини ва Дагъусттаннал Культуралул кьини кIицI лагаврих, маслихIат бунни оьрчIан ниттил мазру лахьхьин буллалисса оьрчIал багъру тIитIин, мукунмасса гъинтнилсса лагерьдугу. Ванил чIурчIав дунни, оьрчIал багъирдаву ва гъинтнил лагерьдай ниттил мазру лахьхьин буллалисса даву хъит куну душиврий, ва ххуллий цалчинсса опыт бушиву. Бувсунни ниттил мазрал ва литературалул дарсру дихьлахьисса преподавательтурал захIматран арцуйнусса кьимат бищун аьркиншиву, Дагъусттаннал халкьуннал мазру лахьхьин буллалисса вузирдавусса студентътуран лайкьсса стипендиягу бишин аьркиншиву. КIицI лавгунни, ДГУ-рал оьрус ва Дагъусттан мазурдил отделениялийсса студентътурансса стипендия ялунгу ххи бувну бушиву. Бувцунни укунсса мисалгу. Сулайман Стальскийл райондалул администрациялул ДГУ-раву ва ДГПУ-раву лазгири маз лахьлахьисса студентътуран стипендия булайшиву. Спонсортал хIисаврайсса кумаг махъми муниципалитетиртталгу буллансса предложение дуллунни. МаслихIат бунни бигьалагай кьинирдай ниттил мазру лахьхьин буллалисса школарду тIитIин, ниттил мазурдинсса дарсру чIяру дуван. Миллатирттал СМИ-рдал сий гьаз даврил агьамшиврийгу бавцIунни. Яла-яларив, миллатирттал мазру ягу бувну, гьаз буваншиврул, агьалинал ва паччахIлугърал уртакьсса хIарачат аьркиншиву, республикалул ведомстварду, цинярда структурарду мазрал политикалух дакIцIуцIаврийсса къулагъас дуллан аьркиншиву.
Узлипат ХIасановал агьамсса ихтилат гьаз бувшиву цала Телеграм-каналданий кIицI лавгунни республикалул Парламентрал каялувчи Заур Аскандаровлулгу. «Жува вай ихтилатру гьаз буварду миллатирттал СМИ-лул вакилтуращалсса хьунабакьаврийгу, агьамсса, къулагъас хъун дувансса масъалартту бур», – тIий чивчунни ванал. Бувсунни Халкьуннал Мажлисрал КIулшиву дулаврил ва элмулул комитетрал каялувчи Елена Павлюченкойн тапшур бувшиву кIай кIицI лавгсса предложенияртту ххал дигьавриха зунсса группа.
ПатIимат Рамазанова
