Мартрал 25-нний Дагъусттаннал ХIукуматрал председатель Аьбдулмуслим Аьбдулмуслимовлул МахIачкъалаллал мэриялий дунни ЛяличIисса тагьардал комиссиялул батIаву, шагьрулул кIира райондалий хьусса иширттал хIакъираву.
Дагъусттаннал бакIчи Сергей Меликовлул тапшурлугърайну, хьусса иширттан хасъсса масъалартту ххал бигьин, оьвкуну бия циняв профил министерстварттал ва идарарттал вакилтурайн, контрольданул ва надзорданул органнайн, гужирдал къуллугъирттайн.
ПIякь учаврийну зараллу бивну бур сайки 50 машиналун, 8-райра къатраву 1000-нниха ливчусса квартирардал чIавахьултту личин бувну бур.
ДакIнин бутанну, Гапцахская кIичIиравусса къатраву кIюрххицIунмай газ пIякь увкуну, азарханалийн биян бувну бур зарал бивсса цаппара инсантал. Муния махъ Шамиллул проспектрайсса къатравугу газ пIякь увкуну, миччагу 4 инсан иян увну ур азарханалийн. ЦIанасса ппурттуву зарал бивминнах духтуртал буруглай бур.
Аьбдулмуслим Аьбдулмуслимовлул тIимунийну, цалчин бартбигьин аьркинну бур Гапцахская кIичIиравусса зараллу бивсса къатравусса ялапарлувтал чIумуйсса паракьат бансса кIанттурдалсса баврил ва миннан кумаг баврил масъала.
Премьер-министрнал бувсунни, ва масъала бартбигьиншиврул дузал буллай бушиву хасъсса комиссия. Ванал тапшур бунни комиссиялувун буххан буван циняв жаваблувсса идарарттал вакилтал ва мукунма надзорданул ва ххассал байсса къуллугъирттал каялувчитал.
БатIаврий бувсмунийну, цIанасса ппурттуву кIул дуллай бур хьусса зараллал лагру, зарал бивминнал аьдад. Тикку зарал бивсса ялапарлувтуран ккаккан бантIий бур чIумуйну паракьат бувансса кIанттурду.
Аьбдулмуслим Аьбдулмуслимовлул ДР-лул жагьилтурал иширттал министр Камил Сяидовлуйн тапшур бунни МахIачкъалаллал мэриялул чIарав ацIан зараллу бивминнан кумагрансса давуртту бартдигьин. Волонтертал кIункIу бантIий бур квартирардавух занай, ялапарлувтуран аьркинсса кумаграл хIакъиравусса информация батIин.
Заседаниялий «Новая жизнь» управляющая компаниялул директор Равиль Эмирхановлул бусаврийну, пIякь учаву хьусса чIумал Гапцахская кIичIиравусса чIявуквартирарду бусса къатрал подъездраву бивкIун бур 2 кулпат. Аьмну тай къатравун бивзун бивкIун бур 30% ялапарлувтурал, тикку бивкIун бур хъунмурчIин квартирардал хахру (каркас).
МахIачкъалаллал ГО-лул ва ЧС-рал иширттал управлениялул хъунама Рабадан МахIаммадовлул тIимунийну, пIякь учаву хьусса квартиралуву левкьун бур кьатIувсса чIиртту ва дячIиртту (перегородки).
ПIякь учаврийну зараллу бивну бур сайки 50 машиналун, 8-райра къатраву 1000-нниха ливчусса квартирардал чIавахьултту личин бувну бур.
Сергей Меликовлул тапшурлугърайн бувну, цIана кьимат бишлай бур Гапцахская кIичIиравусса къатран ва машинарттан хьусса зараллан. Муния махъ кьамул буван тIий бур зараллал хIакъиравусса хIукму.
Тай къатрал чIарав зарал бивминнаясса лабизавуртту кьамул дуллансса кIану хIадур буллай бур ялапарлувтуран къулайну бикIаншиврул. Мукунна тIитIин тIий бур «горячая линия», телефондалувухгу лабизавуртту кьамул даву ва маслихIатрайнусса кумаг баву мурадрай.
Заседаниялул батIаврил хIасиллайн бувну, комиссиялул кьамул бантIий бур МахIачкъалаллал Лениннул райондалий ЧС-лул низам баян буван аьркиншиврул хIакъиравусса хIукму.
ХIадур бувссар ХI.Аьдиловлул
