Ларгсса нюжмардий жулла республикалийн даврил аьрххилий увкIун уссия Аьрасатнал Президентнал Администрациялул Каялувчинал цалчинма хъиривчув Сергей Кириенко. КIулсса куццуй, лавайсса къуллугъчи увкIсса хьхьунува, ванансса, МахIачкъала шагьрулувухсса экскурсия хьуссар. Ванащал ивкIссар региондалул бакIчи Федор Щукингу. Экскурсия бувангу вихшала дурссар жула лаккуоьрчIайн, гьунар бусса гид-таржумачи, Республикалул Туризмалул ва халкьуннал сянатирттал министерствалучIасса Туристический центрданул хъунама специалист, ГьунчIукьатIрал шяравасса Чимаев Абусупияннуйн.
ЦIуххарду Абусупияннухь билаятралгу, региондалулгу хьхьичIунсса политиктурансса экскурсиялия.
– На вайннащал хьунаавкьура Расул ХIамзатовлул проспектрай, МахIаммадаьли МахIаммадовлунсса гьайкалданул чIарав. Дяшагьрулувусса бульварданийх миннащал сайрданий най, на бувсъссия МахIаммадаьли МахIаммадовлуя, ва проспектрайсса Музыкалул училищалия, Р.ХIамзатовлул цIанийсса Национальный библиотекалия. Хъирив, М.Горькийл цIанийсса Оьруснал театрданучIан, Р. ХIамзатовлул гьайкалданучIан гъан шайхту, бусав МахIачкъала шагьру хIасул шаврия ва ванил хIакьинумур оьрмулия, хъунасса шаэрнал творчествалул ирсирая, Оьруснал театрдания. ЛичIину бусав Лакрал театрдания, шиву бихьлахьисса постановкар­ттая, лакку мазрайгума «Гамлет» ккаккан байшиву, ванилгу чIалачIи буллалишиву культуралул лахъсса даража. Бусав шагьрулийсса вузирдая.
Ялавай, хьхьирил чулухунмай бучIайхту, бусав МахIачкъалаллал портрая, туризмалул бугьлагьисса кIанттуя. С. Стальскийл паркравухгу сайр буллай, бусав ванал творчествалия, дуккав ванал ва Расул ХIамзатовлул назмурду, – буслай ур Абусупиян.
Сергей Кириенкол кIицI лавгуна цанма экскурсия хъинну ххуй бивзшиву, хаснура Абусупияннул дурккусса назмурду. Региондалул бакIчинал умуд бивхьунни ва гьунар бусса жагьилнащалсса хьунабакьаву махъра-махъсса дакъашиврийнсса.
БачIи хъярчирай, бачIи буниялану, Абусупияннухь тIий бура, Лакрал театрдания бусласисса чIумал, театрданул цилла къатри дакъашиву кIицI лагансса сант дагьссания, хъинну хьунссия тIий.
– На цалчинма-цалчин щаллу бував экскурсовод хIисаврайсса ттуйвасса бурж. Укун хъина, тукун къахъина тIунсса ихтияргу дакъассар ттухь. Региондалул бакIчинансса экскурсия на цалчинна буллалисса. Машина бавцIуну, гива региондалул бакIчи увксса чIумал на махIаттал хьунав, цанчирча жула хъамаличувнащал вагу икIантIиссар куну ттухь къабувсуна. Чан-кьансса вас-ццах бия, амма мунил ялув пикри буллансса чIуннив дакъая, аьркинну бия ттулла даву ххуйсса даражалий дуван. КIиягу, региондалул бакIчигу, республикалул хъамаличувгу, пиш-пиш тIий ккавккукун, вас-ццахгу лавгуна. Цайми къуллугъчитурая тIурчан, 2023-ку шинал ттуйнгу, цаппарасса цайми экскурсоводтурайнгу тапшур бувуна Москавуллал мэриялул шанма департаментрансса, яни Москавуллал ХIукуматрансса экскурсия. Ялагу, цамур чIумал, Аьрасатнал Федерациялул ПаччахIлугърал Думалул депутатътурал группа бувкIун буссия, ттуйн тапшур бувуна миннавасса ца – Наталья Коптилининансса экскурсия буван, ванин, цийнува цуппа занан къахъанай, цинналусса транспортгу, кумагчигу, нагу циналусса гид хIисаврай ккаккан увну ияв. Ванищалсса экскурсиялия махъ на чIявусса затирттал хIисав ласласи хьунав. БувчIлан бивкIуна цуксса агьамшиву дуссарив инклюзивностьрах къулагъас даврил, учиннуча, маломобильный группардацIун, цIуллу-сагъшиврул ссуссукьуминнацIун дархIусса тIалавшиннарду щаллу даврил. ЦIана Дагъусттаннай чIявуми кIанттурдай пандусру дур, дунугу, вайннувух дур аьмсса правилартту, тIалавшиннарду щаллу къадурну дурсса. Мисалдаран, Наталья Коптилининащал Сулакский каньондалийсса Главрыбалийн лавгсса чIумал хьунадаркьунни ва чулухасса цаппарасса захIматшивуртту. Ванил, ца пандусгу ккаккан дурну, кIицI лавгуна, укунминнуйх лахъан, учIан кьаст лархIуманан агьансса нигьачIишиву дуссар куну.
Бадрижамал Аьлиева