Март зурул 20-нний, республикалул парламентрал сессиялий Дагъусттаннал виваллил иширттал министр Аьбдурашид МахIаммадовлул ларгсса шинал хIасиллу дунни. Министрнал бусласимунийн бувну, 2024-ку шинал республикалий сияхIрайн ларсъсса тахсиркаршивуртту чан хьуну дур 1,1%, амма ххишала хьуну дур кIусса тахсиркаршивуртту 12,1%. Дянивну ларсун, Дагъусттаннай тахсиркаршивурттал чулухасса тагьар СКФО-лийнияр ва щала Аьрасатнавунияр ххуйсса дур.

Ларгсса шинал тахсиркаршивур­тту чIяру хьуну дур Къизлардай, Агъу­ллал,ТIляратIиял ва Хивский районнай. МахIачкъалалив тахсиркаршивуртту ххишала хьуну дур 3,3%.
2024-ку шинал чан хьуну дур бавцусса инсантурал ккал, хъямалашин, арцу цIирккусса ва цурк бувсса ишру, мукунна сакиншиннарайсса группардал дурсса тахсиркаршивуртту. ЧIяву хьуну бур инсан оьрмулуцIа увсса, цIуллу-сагъшиврун цIунцIия дурсса, гуж-къия, чапхун, хIарамзадашивуртту дурсса, машинартту бавцусса ишру. ЧIаланну ххишала хьуну дур информациялул ва коммуникациялул технологияртту ишла дурсса тахсиркаршивуртту 57,9%.
Министрнал кIицI лавгунни, ларгсса шинал аьмну тахсиркаршивуртту ашкара даврил тагьар ххуй хьушиву 81,3%.
Тахсиркаршивурттаву оьрмулуцIа хьу­сса инсантурал ккал 6,4% ххишала хьуну дур, захIматсса цIунцIияртту хьуссаннал – 11,1%. ЧIявуми тахсиркартал оьрмулул 30-49 шиннавусса бур. Ххишала хьуну бур балугъравун къабивсса тахсиркартал 20,6%, чан хьуну бур рецидивистътал.
Министрнал кIицI лавгунни, структуралул гьар мудан кунма, хьхьичI ххуттайн лавсун бушиву терроризмалул, ярагъ ва наркотикру закондалуцIун къабавкьуну ишакаш баврил масъалартту.
Андриана Аьбдуллаева