Мубараксса Рамазан-зурул, дакIру марцI ду­ккан даврицIун, АллагьначIан гъан баврицIун, цIакь дуллай бур личIи-личIисса миллатир­тталгу, инсантуралгу дянив­сса арарду. Ссал къабагьари диндалул уссурвавращал цачIу щябивкIун зума итадакьин бувкусса цIу-ччатI, увкусса ххув. Вай гьантрай Москавлив хьунни ца мукунсса щябикIаву – «Цашиву» тIисса Культурно-просветительский центрданийсса лакрал ифтар.

Ванийн бувкIун бия Москавлив ялапар хъанахъисса лак. Вайннащал бувкIун бия личIи-личIисса миллатирттал инсанталгу.
Мажлисрай гьуртту хьусса МухIаммад Майрановлул цалва ихтилат байбивхьуна Дагъус­ттаннал муфтиятрал чулуха­сса барча баврийну. Ихтилат бувна Дагъусттаннал гуманитар институтраву дарсру дихьлахьисса, КIундиннал шяравасса МухIаммадвакил Дадаевлулгу, мукунма цайминналгу. Ихтилатругу бия диндалул кIулшивуртту ласаврийн, оьрчIру хIакьсса диндалул ххуллий тарбия баврийн багьайсса.

Хьуна, дин цуманан ххуйну кIулну дурив ккаккаву мурадрайсса, хъаннинсса, арамтурансса ва оьрчIансса викторинарду, конкурсру, вайннуй хьхьичIун ливчуми лайкь хьуна бахшиширттан. «Амсар» группалул щаллу бувна нашидру.

Мажлис хIадур баву къабигьасса даву дур. Ва бусравсса давриву хъуннасса хъар лархъунни КIундиннал шярава­сса АхIмад ХIажибуттаевлул ва Шахьуйннал шяравасса Милана Мусаевал. АхIмадлуй бия билаятрал хъуншагьрулий ялапар хъанахъисса лакрал жагьилтал, арамтал лагма лаган баву, Миланай – хъами-душру цачIун баву. Вайннал дукIугу дурссия лакрал ифтардануцIун дархIусса сакиншиндарал даву. Миланал ва даву дукIу ва гьашину дурну духьурча, АхIмадлул Москавлив ифтардалсса ваниннингу цимилгу бувссар.
КIира шин хъанай дур ва Центр тIивтIуну. Ванил каялувчину ур Дагъусттаннал Муфтиятрал вакил МухIаммад Дибирдадаев. Центрданул агьа­мми мурадруну бур Дагъусттаннал халкьуннал мазру, аьдат­ру ядаву, рувхIанийсса культура ларай даву, хъинсса давуртту давриву инсантал цачIун баву ва цаймигу. Вай мурадирттайн бияврил ххуллий шикку дувай­ссар личIи-личIисса шадлугъру ва батIавуртту. Лакрал дакъасса, цайми миллатирттал ифтардугу.

Ва кьини ифтарданий хьуминнаву къачансса бия ттинин ва журалул шадлугъирттай цалвагу къавхьуссагу. Вайгу, махъсса цаймигу шичча рязину лавгунни, ялуннингу уку-укунсса мажлисирттай батIлансса каши дулуннав Хъунасса Заннал, ва даву дуллай захIмат бивхьуминнангу бувмур чирину зана бикIаннав тIисса дуаьрдай.

Бадрижамал Аьлиева