Байбихьлахьиссар «Лакку кIанттул Лигалул» 11-ми тIуркIурду 

Сентябрьданул 13-нний байбихьлахьиссар «Лакку кIанттул Лигалул» («Лига Лакии») 11-ми тIуркIурду. Лакку футболданиясса ва лакрал футболистътураясса ихтилат буварду «Лакку кIанттул Кубокрал» ва «Лакку кIанттул Лигалул» Сакиншиндарал комитетрал каялувчи ЖахIпаров ­Руслан ­Оьмардул арснащал.

Руслан ЖахIпаров увну ур 1982-ку шинал Душанбе шагьрулий, Шахьуйннал шярава­сса ­Оьмардул ва ПатIимал кулпатраву. Махъату вай бивзун бур Дагъусттаннайн. Русланнул къуртал бувну бур МахIачкъалаллал шагьрулул 10-мур школа. Хъирив ДГУ-лул юридический факультетрайн увххун, 2004-ку шинал вагу къуртал бувну, 4 шин дурну дур Москавлив виваллил иширттал органнай зий. 2008-ку шиная шинай зий ур поликлиникарттал ва аптекарттал «Целитель» компаниялий юристну. Ванал кулпат Карина бур ингилис мазрал учитель. Вайннал дянив ур шама оьрчI.

– Руслан, бур «Лакку кIанттул Лига», бур «Лакку кIанттул Кубок». Ци личIишиву дуссар миннул дянив?
– Лакрал футболданул сообществалул футболданул сезон сакин хьуну дуссар цаппарасса турнирдая. Интту бувайссар Кубок, ссуттил – Лига, кIинттул – Сурхай-ханнал Кубок. Вай цимурцагу – мини-футболли. Аьмну лигалия ва кубокрая тIурчан, кIулсса куццуй, лига му дур командарттал чемпионат, гьарца команда цаннищал ца бястлий дуккайсса, сезондалул хIасиллайн бувну ххув хьумур язи дугьайсса.

 Кубокрив хъанахъиссар дух хьумур команда, хIатта ца матчрайгума, тIуркIурдава личлачисса турнирну.
Бяст-ччаллу хъанахъиссар Лакрал, Ккуллал, ЦIуссалакрал, Ахъушиял, РутIуллал районнал шяраваллал жагьилтурал дянив.
Лакку футболданул сезондалул дайдихьулий, интту, «Лакку кIанттул Кубокрал» цалчинмур кьини, бувайссар Аьрасатнал Виричув НурмахIаммад ХIажимахIаммадовлул аьпалунсса Суперкубок. Ваний гьуртту шайссар хьхьичIмур шинал «Лакку кIанттул Кубокрай» ва «Лигалий» ххув хьуми.

 Хъиривва байбишайссар Сиражуттин Илиясовлул аьпалунсса «Лакку кIанттул Кубок». Ва бувайссар Дунияллул ва Европанал чемпионатирттах буруглай жува аьдатсса системалийн бувну. «Лакку кIанттул Кубокрал» харж-хуржлилсса щаллуну бувайссар Илиясовхъал кулпатрал. Ва цурдагу ляличIиссара турнирди. Шикку ца хъунмасса бавкьусса кулпатраву куннасса тагьар, атмосфера, чаннасса асарду, арарду дикIайссар. Вай бяст-ччаллай бух хьумигума лагайссар ххуйсса асардащал, ххарину, рязину, цанчирча ва турнирданул мурадру ччянива бувккун тIий так ца спортрал мероприятиялул лагрулува. Хъунмасса барчаллагь Илиясовхъал кулпатран мудан чIарав бушиврухлу, хъунмасса барчаллагь циняв гьурттучитуран ва болельщиктуран.

ЦIакь хьусса аьдатрайн бувну, ссуттил, сентябрьданул цалчинсса алхIаткьини, байбишайссар «Лакку кIанттул Лига». Гьашинумур, тIайлассар, площадка бакьин буван хъирив къалавну, байбихьлахьиссару ца нюжмардул чIалну, ва ялун нанисса алхIаткьини. Лига сакин хьуну буссар Лаваймур дивизиондалия (Суперлига) ва Цалчинмур дивизиондалия. Суперлигалий дуккайссар 12 язисса команда, Цалчинмур дивизиондалий – классрал яларайми командартту.

Шиккува кIицI лаган, ссуттилми турнирдансса муданасса спонсор акъассар, умуд бур лякъинссар тIисса. Мунияту, ссуттилмур футболданухсса харжлугъ цалсса так командарттал взносирттайну щаллу хъанахъиссар.
КIинттул, декабрьданий, дувайссар ца ялагу кубокрал турнир – «Сурхай-ханнал Кубок». Ва хъанахъиссар экспериментальный турнирну, цийгу цIусса ци-дунугу цукун шайрив ххал дуллалисса. Мисалдаран, дукIу ваний жулла республикалий цалчин ххал дурссар группалул раунд даврил швейцарнал система, Европанал чемпионатирттал мисалданийн бувну.

– Гьашинумур «Лакку кIанттул Лигалул» турнирду чуври дикIантIисса? Ялагу, дикIантIиссарив, хьхьичIсса ацIунний къадиркIсса, ци-дунугу личIишиву, ляличIишиву?
– Лигалул бяст-ччаллу хъанантIиссар МахIачкъала шагьрулул 11-мур гимназиялул майданнив. Цинявппагу 12 тIуркIу хьунтIиссар. Гьашинуми бяст-ччаллу (Кубок бикIу, Лига бикIу) хьхьичIминнуяр ляличIину буварду, буллалиссару учин къахьунссар. Мукун, Лигагу хьунтIиссар стандартнайсса схемалийн бувну. Так Цалчинмур дивизиондалувуми командартту дукIуминнуяр ххишаласса дур (дукIу – 15, гьашину – 19). Гьашину гьуртту хъанай дур къадуклай шинну хьусса командарттугу, мисалдаран, Чапаево ва 1-мур ЦIувкIул шяраваллал командартту 5 шинавун зана хьунни. Ххи хьунни Гьамиящиял (ЦIуссалакрал район) кIилчинмур командагу. ЦIуну ялун дирсса Гьущинналмур команда хьунни ва сезондалул дебютант. Шиккува учин, Цалчинмур дивизиондалул командарттахь дуссар легионер уцинсса ихтияр, яни цала шярава акъасса ца инсан цалла командалувун уцинсса.

 Вайми командарттаярив кьянкьасса тIалавшинна дуссар шяраваллил командалувусса игроктал так га шяравасса бушиву, ягу, нину ца шяравасса, ппу цамур шяравасса ухьурчан ихтияр дуссар ми кIирагу шяраваллива цания-цаннихлу уккансса.
Ца цIушинналун ккалли дуван бучIир турнирдацIун бавхIуну соцсетирдай буллалисса текстру оьрус мазрацIун я щаллуну лакку мазрай, я шивасса абзацру лакку мазрайн таржума бувну буллай байбишавугу. Ва даврил мурадгу жагьилтураву ниттил маз машгьур бавур, лакралми турнирдал цайми миллатирттал турнирдаясса личIишиву, ляличIишиву дикIавур. Ва лакрал футбол буния махъ, лакку мазрайсса чичрурдугу дикIан аьркинни ва миллатрал турнир душиву тасттикь буллалисса.

Ялагу, зун укунмагу кIуллича, буккултрангу кIулну бикIан: вай шиннардил мутталий зу, «Илчи» кказит, вай турнирдая мудангу чичлай бивкIнугу, зулгу, жулгу дянивсса уртакьшиврийсса зузаву цIусса ххуттайн дуккан дуллай, вания тинмай «Илчи» кказит официалнайну баян буллалиссар Лакку кIанттул Кубокрал ва Лигалул информацион партнерну.
Аьмнурив вай шиннардий къачансса дахханашивуртту хьунни, хъунмурчIингу – сакиншиндаралмур давриву. Шиккува учин, тIааьнни гьарца интту ва гьарца ссуттил, вай махъсса 11-гу шинал мутталий, лакрал жагьилтал футболданий буккан батIлатIаву. Ва анжагъ футбол къахъанахъиссар, ва хъинну ххуйсса аьдатри лакрал жагьилтал куннащал кув кIул буллалисса, дусшиврийсса арарду цIакь дуллалисса.

Ххаришиву дикIай гьурттучитурал состав жагьил хъанахъисса чIалай. Ванияр 10-11 шинал хьхьичI, вай бяст-ччаллу буллай дахьва байбивхьусса чIумал буклай бивкIми тти ца майданнив буклай бур цала арсурвавращал, ссил-уссил оьрчIащал. Мунийн бувну махъсса шиннардий цIусса номинациярттугу дурккунни, мисалдаран «преемственность поколений» тIисса. Ва номинациялий интту хьусса Лакку кIанттул Кубокрай кIицI лавгссар Читтурдал шяравасса Кьурбановхъул (Маллааьли ва Шарип) кулпатрал дуэт ва ЧукIнатусса Ибрагьимовхъал (МахIаммад ва Аюб) кулпатрал дуэт.

– Буси инава футболданухух та машхул хьуссарав, Лакрал футболданувун та увкIссарав.
– На футболданул «азарданул увгьунна» оьрмулул 10 шинаву, телевизорданувух СССР-данул матчрах («Спартак» – «Днепр») уруглагисса чIумал. Муния шиннай ттун буниялану ххира хьуссар ва спорт. Футболданул школалийнгу занай уссияв, хъунмур къулагъас дуккаврих дуллай, ттуява хъуна футболист къахьурчангу. Ялагу, боксрахунгу, водное пололухунгу агьну икIайссияв.
2016-ку шинал апрельданий «Гъази-Гъумучи» фондрал активистътурал дурссар лакрал жагьилтурал дянивсса футболданул цалчинмур турнир. Инттуми бяст-ччаллай на акъассияв. Му шинал ссуттилми бяст-ччаллай ттулла шяраваллил командалущал гьуртту хьуну, муния шинай уклай ура лакку футболданий.

– Аьмну вай бяст-ччаллаягу ца-кIива хха.
– Га чIумал щинчIав пикривагу багьшиву къакIулли цал дурсса ва спортрал шадлугъ укунсса даражалийн лахъанссар тIисса. Цалчинна-цалчинмур турнирданий ххув хьуссар Читтурдал команда. Му чIумал му командалуву уклай уссия цува Марис Илиясовгу. Хъирив, ва ххуйсса сипта дяличIан къаритан, даву цайнна ларсъссар командарттал капитантурал, 10-15 инсанная сакин хьусса группалул. Вай, буржру ва тIалавшиннардугу дарчIуну, 5-6 шинал мутталий зий бивкIссар так цалла энтузиазмрай. Цалчинмур турнирданул бяст-ччаллаву ххув хьуминнансса бахшиширттахсса харжлугъгу, вай циняв шиннардийми кунна, щаллу дурссия Илиясовхъал кулпатрал. Чан-чанну тIий, вай бяст-ччаллал сакиншинна дуркссар цамур схемалийн.
Жул буссар Капитантурал совет, буссар жула аксакалтурая (Марис Илиясов, Эмиль Ттаттаев, ХIасан Аьлиев, Амирхан Амирханов) сакин хьусса Попечительтурал советгу, жу вайннайн буккайссару, щаллу буван захIмат хъанахъисса масъаларттахун багьсса чIумал.

– Цайми миллатиртталгу дайривав укунсса турнирду?
– Укунсса къадуварчангу, дувайссар, мисалдаран, районну чIярусса яруссаннал. Жулла куннасса миллатрал турнирду дакъарча, райондалулми дур, Хъунзахъиял ва цаймигу районнал. Къумукьнал уттигъанну дунни цалчинсса турнир. Цайминналгу духьунссар. Амма сивсуну учин бюхъанссар лак ва иширавугу цалчинмири, лакрал кунмасса даражалий вай бяст-ччаллу цайми миллатирттал къабуллалиссар куну. На шикку национал лигалияра тIисса. Укуннасса турнирду, командартту цайми чIяруссар.

– Барчаллагь, Руслан. ТIайлабацIу баннав.