Ххуллункьини Лакрал райондалий хьунни цIадурксса грэпплинграл тренер Аьбдуллаев Мурад Исмяиллул арснащалсса хьунабакьаву.

Цувгу хъанай ур Аьрасатнал грэпплинграл цачIундур командалул хъунама тренер, Дагъусттаннал грэпплинграл Федерациялул президент, Ухссавнил Ккавкказнал федерал округрайсса грэпплинграл федерациялул вакил.
Хьунабакьаврий гьуртту хьунни райондалул администрациялул зузалт, идарарттал каялувчитал, дуклаки оьрчIру.
Мурад Аьбдуллаев бавтIминнащал кIул уллай райондалул бакIчи Зураб Куччаевлул хьхьичIунсса тренер ва насихIатчи хIисаврай ванал ларайсса пишакаршиврущал кIицI ларгунни хъуни-хъунисса ххувшавурттал гьануну хьусса хасиятру.
– Жу ххарину буру дунияллул цимивагу чемпион тарбия увсса ватанлув хIакьину буттал аьрщарай хьунаакьин. Жун кIулссар мусил медаль ласуншиврул цуксса захIмат бишин багьайссарив тарбиялувнащал. Чемпионнал шачIанттуйн лахъан аврицIун ина мунаву тарбия дуллалиссара хасият. Барчаллагь вин багьа бакъасса захIматрахлу, спортрайн дакI тIайлашиврухлу.
Мурад Аьбдуллаевлул барчаллагь увкунни райондалул бакI дургьуминнахь, цахара дурсса къулагъасрахлу, спортран кабакьу буллай бушиврухлу.

– Ххарину ура ттуйнма буттал аьрщарайн оьвчаврихлу. Шикку буссар ттул мархри, шикку ттух мудан ялугьлай буссар, шикку на даин хIурматрай кьамул айссара, – увкунни спортсменнал.
КIицI лавгунни дунияллул чемпион тарбия аву бакъасса, цала даврил агьаммур мурадну ккаклай ушиву хъирив нани­сса ник цIуллусса оьрмулухух гьан даву. Гьамин, единоборствардалли хасият сасан дайсса, кIичIирая бурувччуну, тIайласса оьрмулул ххуллу лякъин жагьилтуран кабакьу байсса, – тIий ур тренер.
Цувагу кабакьу буллан дакIний ура, увкунни, буттал улклул ирс ябаврил ххуллийсса давурттан. Ххи бунни дакI дарцIуну ушиву райондалул спортшколалия хьхьичIунсса оьрчIру буккантIишиврий.
– ЦачIу жущара тарбия дан бюхъантIиссар райондалул ва билаятрал цIа гьаз дансса цимирагу ник спортсментурал, – увкунни ванал.
Райондалул жагьилтурал цIания спортсменнахь барчаллагь увкунни администрациялул жагьилтурал политикалул, спортрал ва туризмалул пишакар Аьбдул Юнусовлул:
– ХIурмат лавайсса Мурад Исмяилович! Вил гьавас, спортрайн дакI тIайлашиву эбратну хъанахъиссар жула жагьилтуран. Ина кунмасса инсантурах буруглайри жагьилтураву хьхьичIунмай хъит тIунсса гъира чантI тIутIисса. Зуру вайннаву тарбия дуллалисса кьянкьасса хасият ва низам. Вил тарбиялувтурал машгьур буллалиссар жула билаят дазул кьатIув», – увкунни ванал.
Райондалул чулуха Мурад Аьбдуллаевлун буллунни Барчаллагьрал чагъар ва хъамакъабитулунсса ссайгъат.
Мероприятиялул макьу хъиннура гьаз дурунни Магьирлугърал къатлул зузалтрал балайрдал.