ХьхьичIунминнал каши-кьудрат
Ноябрьданул 9-нний, МахIачкъалалив, Тарихрал музейраву хьунни «Движение первых» тIисса Дагъусттаннал региондалийсса отделениялул даврил хIасиллу дуллалисса конференция ва Республикалул жяматийсса иширттавух чялишсса гьурттушинна дуллалисса хьхьичIунсса жагьилтуран «Лучшие в Движении» тIисса премияртту дуллалисса шадлугърал мажлис.
Шикку гьуртту хьунни республикалул районнаясса ва шагьрурдаясса 300-ннийн бивсса дуклаки оьрчIру, студентътал, насихIатчитал ва педагогтал.
Конференциялул даву дайдишин хьхьичI музейрал жанахIраву тIивтIуну бия дуклаки оьрчIал ва студентътурал цала гьунарду аьч буллалисса ва хIал ххал бигьлагьисса площадкартту. ЧIалай бия вайннал кIунттихь бушиву билаятрал тарих ябаврил, тIабиаьт дуруччаврил, цIанасса заманалул технологияртту лахьхьаврил ва цаймигу хайр-мюнпат бусса пишарду ахттар буллалисса ххуллурду.
Мероприятие дайдирхьуна Аьрасатнал паччахIлугърал гимнрайну. Хъирив МахIачкъалаллал Росгвардиялул Аьралий оркестрданул хъунама, Дагъусттаннал халкьуннал артист, майор Илияс Бакмурзаевлул каялувшиврийсса оркестрданул патриот композициярттайну дайдирхьуна конференциялул даву.
ДР-лул Халкьуннал Мажлисрал председатель Заур Аскандаровлул чулуха гьурттучитал ва хъамал барча буллалисса ихтилат бувна ДР-лул Халкьуннал Мажлисрал председательнал хъиривчу, «Движение первых» суккушиндарал цалчинсса насихIатчи Елена Павлюченкол.
Ванил кIицI лавгуна, гьашину мукьилчинсса шин хъанахъишиву жагьилтуран кIулшиву дулаврил ва тарбиялул ххуллийсса чялишсса давуртту дачин дурсса «Движение первых» тIисса суккушиндаран.
Конференциялий балжину бувсунни региондалийсса отделениялул даврил хIасиллая, дузрайн дуккан дурсса агьамсса проектирдая, гихуннай дуллантIисса даврия. ЦIуницIакул бувчIуна конференциялул даву дачин дансса органну, цIакь дурна региондалийсса отделениялул цIусса команда, цинявппа рязину, бувчIуна Советрал отделениялул председательну Людмила Саидова. Конференциялийсса агьаммур ихитилатгу ванил бувна.
– ХIакьинусса кьини республикалийсса «Движение первых» отделениялул кьюкьраву ур 446 азара гьурттучи, 407 500 дуклаки оьрчI ва 38 500 насихIатчи. Так ца гьашинусса шинал отделениялул кьюкьравун увххунни 74 000 дуклаки оьрчI, студентътал ва насихIатчитал. КIантту-кIанттурдайсса отделенияртту зий дуссар 52 муниципал райондалий ва республикалул шагьрурдай. Республикалий чялишну зий дуссар 1900 отделение, миннува 1310 дур школардай тIиртIусса. Гьашинусса шинал «Движение первых» проектирдаха зий уссар 150 азара инсан. Дайдихьулий тIиртIусса отделениярттал дянив баян бувну бивкIсса конкурсирттай Дагъусттаннаясса 62 командалул кIантту бувгьуну, вайннал даврин кабакьу баву мурадрай, 14,8 млн къурушрал буллуну бур.
Республикалул кIира проектрал 10,5 млн грантрал лайкь дурну дур. КIицI лаган, «Движение первых» суккушиндарал мероприятиярттавух гьуртту хьуну бур 512 балугъравун биян бувасса, профилактикалул сияхIрайсса оьрчIру, миннавагу 384 увххуну ур суккушиндарал кьюкьлувун.
КутIасса чIумул мутталий суккушинна хъунна ва хьхьичIуннай хъанай най дур. Кьянкьану учин бюхъанссар, жула жагьилтурал каши-кьудратрайну чIярусса проектру ва давуртту дузрайн дуккан дуван бюхълай бушиву, – увкунни Людмила Саидовал.
Конференциялий личIинува бавцIунни «Совет первых» тIисса, дуклаки оьрчIру, студентътал республикалул жяматийсса иширттавух хIала буллалисса, миннахь насихIатру бусласисса даврия.
«Лучшие в Движении» тIисса премияртту дуллалисса мажлисрай гьуртту хьунни Дагъусттаннал региондалийсса «Движение первых» отделениялул каяувчи Людмила Саидова, МахIачкъала шагьрулул хъунаманал хъиривмур, КIулшиву дулаврил управлениялул хъунмур Шаганэ Баймурзаева.
«Лучшие в Движении» тIисса премия лайкь дурминнавух бия ЦIуссалакрал райондалийсса «Движение первых» отделениялул каялувчи Жамилат Мусиева.