МахIачкъалалив Татам Мурадовлул цIанийсса филармониялул гъинттулмур залдануву хьунни Аьрасатнал Кинорал кьинилун хас дурсса «Ночь кино» акциялийсса киносуратру ккаккан даву. Вай хьунни щалагу Аьрасатнал «Большие семейные выходные» тIисса проектрал лагрулий. Вайннул кьинирдавасса ца хас дурну дия «Тайна рукописного Корана» фильмран. Шиккун оьвкуну бия ва фильмраву ца агьаммур роль дургьуну ивкIсса Хан Башировлуйнгу.
Сеанс ккаккан дулланнин бавтIминнал хьхьичI махъ лавхъуна Дагъусттаннал халкьуннал артист Марат Тимохиннул. Ванал бувсуна ва фильмрая, ва цукун ларсъссарив, ванивух цу гьуртту хъанай ивкIссарив.
БавтIминнал хьхьичIун ва кьини уккан увна Хан Баширов, амма цIа дурксса пианист хIисаврай акъача, агьаммур роль дургьусса актер хIисаврай. Ванал бувсуна фильм ласлай бивкIсса чIумуя, га ппурттуву кIул хьун цанма бахтти хьусса актертурая ва режиссертурая. Шиккува Хан Башировлун буллуна Аьрасатнал Кинематографистътурал союзрал председатель Никита Михалковлул цIаниясса Барчаллагьрал чагъар.
Ахирданий цинявнналагу ххал дурна ва киносурат.
«Тайна рукописного Корана» фильм ларсун дур «Владикавказ-телефильм» киностудиялул 1991-ку шинал. Режиссер-постановщик Рафаэль Гаспарянц, оператор-постановщик Михаил Немысский, композитор Мурад Къажлаев. Фильмравух гьуртту хьуну бур Ухссавнил Ккавкказнавасса чIявусса актертал. 2007-ку шинал ва кинолента лайкь хьуну бур Дагъусттаннал яла лараймур наградалун – Дагъусттан Республикалул ПаччахIлугърал премиялун.
Бадрижамал Аьлиева
