Зарема Буттаева ва Даниял ХIажиев
Гьарца шинал мартрал 25-нний кIицI лагайсса Культуралул зузалал кьинилун хас бувсса мажлис хьунни Дагъусттан Республикалул Культуралул министерствалий. Ваний ларайсса цIарду ва наградартту дуллунни ва ххуллий зий-заназиминнан.
БакIрайва Дагъусттан Республикалул культуралул министр Зарема Буттаевал бавтIми барча бувна пишакарсса байрандалущал, чIа увкуна цIу-цIусса хьхьичIуннайшивуртту.
– Зухь гьарцаннахь бакIра-бакIрах хъунмасса барчаллагь учин ччай бура дакIнийхтуну буллалисса захIматрахлу. Гьарцама цала кIану багьавай бугьлагьиссар – пишакарсса театрданул искусствалуцIун, концертирттацIун, жулва халкьуннал ххишала бакъа авадансса культуралул ирс ва багьу-бизу ябаврицIун, музейрал, библиотекалул даврицIун, ссацIун дархIусса давриха зий бухьурчагу зу, – увкуна Зарема Ажуевнал.
Мукунма барчаллагь увкуна СВО-рал зоналийн, передовойлий ва аьралий госпиталлай концертру ккаккан дуван лавгсса артистътурахь ва коллективирттахь
Гихуннай министрнал дуллуна личIи-личIисса наградартту. Вай ларсминнавух, муданма кунма, къачанъя лакгу. ЧIярусса шиннардий дакI марцIну бувсса захIматрахлу, чIалачIи дурсса ккаккиярттахлу Дагъусттан Республикалул Культуралул министерствалул чулухасса ХIурматрал грамоталун лайкь хьунни Ккуллал райондалийсса Хъювхъиял шяравасса, Ахъушиял райондалийсса Хъюллал шяраву ялапар хъанахъисса Османова Аминат Шяпинал душ – халкьуннал искусствалул художник, Аьрасатнал Художниктурал союзрал член; Ккуллал райондалийсса 1-мур ЦIувкIуллал шяраваллил «Детская школа канатоходцев» ДО-лул преподаватель Мамаев Камил Аьбдуллагьлул арс. ЧIявумиллатирттал культура хьхьичIуннай давриву бивхьусса бутIлухлу, жяматийсса давривусса гьурттушиндарахлу Дагъусттан Республикалул культуралул министрнал чулухасса Барчаллагьран лайкь хьунни Лакрал райондалийсса КIундиннал шяраваллил Культуралул къатлул директорну зий чIярусса шиннардий захIмат бувсса ХIажиев Даниял Исмяиллул арс. Барча тIий вайннахь наградарттугу, пишакарсса байрангу, чIа тIий буру цанна ххирасса давурттай ттигу чIярусса шиннардий зунсса цIакьсса цIуллушиву ва гьавас.
Лажин хIадур дурссар
Бадрижамал Аьлиевал
