Майрал 22-нний «Анжи-Ареналий» мотоциклетру ссур даврил сезондалул дайдихьу дуллалисса ва «Хьхьунил барцIру» байкертурал клуб Каспийскалийгу расмийну тIитIлатIисса шадлугъ дия. Ваний гьуртту хьунни Каспийск шагьрулул администрациялул хъунаманал хъиривчу Казбек Демиров ва аьралий комиссар Марат Пашаев.
Ва байкертурал клубрал вакил Ражаб Ражабовлул кIицI лавгунни укунсса официал къатта байкертурал клубран аьркинну бушиву, мотоциклистътуран мюхчаншиврул низам ва къакIулмур лахьхьин булланшиврул. Ванал бувсмунийн бувну, шамилчинсса шин дусса дур Ражаблул «Хьхьунил барцIру» кьюкьлуву. Байкертурал цала мурцIу бикIаншиврул, ванал уртакьтуращал хьхьичIва калпушру байсса завод бусса кIану, лази-лакьи бувну, бакьин бувну бур. Байкертурал клубравун бухханшивруллив так мотоциклет душиву гьану бакъар, клубрал давриву хIалану икIансса гъирагу аьркинссар тIий ур. Мотосезондалул дайдихьулул савлугъран байкертурал ва кьини тIутIив дирхьунни Буттал КIанттул цIанийсса Хъунмасса дяъвилий ва Авгъанисттаннайсса дяъвилий ливтIусса вирттаврал гьайкаллацI, бивунни вара кьини Хъун мизитравунгу.
Бусан ливчIунни ва байкертурал клубращал уртакьну зий ушиву 1-мур ЦIувкIратусса пагьламан Камил Маммаев, Москавлив ва цаймигу хъунисса шагьрурдай хьусса байкертурал мероприятиярттай вагу гьуртту шайшиву.
