Дагъусттаннал паччахIлугърал университетраву дуклакисса шиннардий 553 выпускникнал бувсса хъунмасса захIматрал хIасилну хьунни вайннал лавсъсса ЯтIул дипломру. Вай гьантрай вай дипломру цалва-цалва заллухъруннахьхьун шадлугърай даражалий буллалисса батIаву хьуна ДГУ-раву.

Университетрал фойеравун буххайхтура щуркIал хъанай дия ва кьинилул агьамшиву – шикку рурцуну бия Дагъусттаннал паччахIлугърал Т. Мурадовлул цIанийсса филармониялул камерный оркестр. Шадлугъ цурдарив дайдирхьуна Аьрасатнал Федерациялул гимнрая ва студенчествалул «Гаудеамус» гимнрая. Вай къуртал хьуну махъ ДГУ-рал ректор Муртазяли Рабадановлул, дуккаврил шинал хIасиллугу дурну, барча бувна выпускниктал ва ххарисса ва агьамшиву дусса кьинилущал.
– Ялату ларгсса 2022-2023-ку дуккаврил шин дия университет­рал щалвагу коллективран бигьа дакъасса, ва кIанугу бавхIуну бия кIулшиву дулаврил программартту цIу лаган дуллалаврицIун ва ва иширайн дагьлагьисса документациялуцIун. Ва дуккаврил шинал ДГУ-равусса хIасиллу дуллалисса паччахIлугърал аттестация (Итоговая государственная аттестация) щаллу хьунни 3 870 жагьилсса пишакар итаакьаврийну: вайннавух ур бакалавриатрал 35 направлениялий ларайсса кIулшивуртту ларсми, специалитетрал 5 специальность ларсми, магистратуралул 29 направлениялий дуккаву щаллу дурми ва дянивсса пишакар­сса кIулшиву 4 специальностьрай ларсми. Ва шинал дуккаву марцIсса ххювардай щаллу дурунни вузраву цивура 533 инсаннал (аьмсса выпускрал 22 %); филиаллаву – 82 инсаннал (16%). Дянивсса пишакар­сса кIулшиву дулаврил программарттайн бувну: вузраву – 64 инсаннал (21%); филиаллаву – 54 (9%). Ттул пикрилий, вай ххаллилсса хIасиллур. Барча буллай ура университет хьхьичIунну къуртал бувсса цинявппагу, чIа тIий ура зунна лайкьсса давуртту лякъаву. Магистратуралувун буххан ччиминнах тIурча, ялугьлай буру ДГУ-раву, – увкуна ректорнал.
ДР-лул Халкьуннал Мажлисрал председатель, ГЭК-рал «Юриспруденция» направлениялул председатель Заур Аскендеровлул цалвамур ихтилатраву чIурчIав дурна студентътурал кIулшивурттал лавайсса даражалий, кIицI лавгуна выпускниктурал аьмсса ккалдания 58% хьушиву паччахIлугърал экзаменну марцIсса ххювардай ва мукьвардай дуллусса, мукунма дипломрал давуртту ва магистратуралул диссертациярттугу ххуйсса кьиматирттай щаллу дурсса.
Выпускниктурахьхьун юрист­нал пиша лавхьхьушив­рулми дипломру буллуна ПаччахIлугърал Думалул депутат, Думалул коми­тетрал член Бийсултан ХIам­заевлул. Ваналгу барча бувна выпускниктал, чIа увкуна вайннан мукьахунмайгу тIайлабацIу.
Мажлисрал гихуннайсса программалуву культуралул факультетрал студентътурал кка­ккан бувна музыкалул номерду, цинявппагу выпускниктурал цIания цахьра дарс дирхьуминнахь барчаллагь тIутIисса, архIал дуклай бивкIминнан тIайлабацIу чIа тIисса махъ лавхъуна филологиялул факультет­рал выпускник Рамазан Рамазановлул.